Beıjiń- 2022: Qazaqstannyń frıstaıl akrobatıkadan komandalyq jarysqa qatyspaý sebebi aıtyldy

NUR-SULTAN. QazAqparat – Beıjiń olımpıadasynda qazaqstandyq sportshylardyń frıstaıl akrobatıkadan komandalyq jarysqa shyqpaýyna qatysty túsinik berildi, dep habarlaıdy QazAqparat tilshisi.

«Biz negizi frıstaıl akrobatıkadan 2 sanat boıynsha qatysýymyz kerek edi. Birinshi komandalyq, ekinshi jeke. Ókinishke qaraı, koronavırýs keri áserin tıgizdi. Qyzdarymyz Fınlıandııada daıyndyqta edi, sportshylardyń PTR testi oń nátıje kórsetti. Oń nátıje bolǵannan keıin biz Aqmarjan Qalmurzaevany sol jaqta ustap otyrdyq. Beıjińge alyp keleıik degenbiz, oǵan bul jaqta COVID-19-ǵa talap qatań. Birden karantınge jaýyp tastaıdy», - dedi Qazaqstannyń ulttyq olımpıada komıteti sport dırektsııasynyń dırektory Elsııar Qanaǵatov Beıjińmen tikeleı efırde ótken baspasóz máslıhatynda.

Ulttyq olımpıada komıteti ókiliniń aıtýynsha, sportshylarymyzdyń frıstaıl akrobatıkadan komandalyq jarysqa qatysa almaýyna Qazaqstan tarapynan kiná joq.

«Qosymsha PTR testin tapsyryp, koronavırýs anyqtalmaǵan soń ǵana Beıjińge kele aldy. Bunda kelgen soń taǵy tekseristen ótti. Sóıtip frıstaıl akrobatıkadan jeke túrde baǵyn synady. Biraq komandalyq jarysqa qatysa almadyq», - deıdi ol.

Buǵan deıin elimizde birneshe qysqy sport túri boıynsha arnaıy baǵdarlama ázirleý kerektigi aıtyldy.