Beıjiń-2022: Qazaq sportshylaryna júldeniń aýyly alystap barady

Qazaq sportshylaryna júldeniń aýyly alystap bara jatqandaı. Aq Olımpıada oıyndarynyń aıaqtalýyna sanaýly kúnder ǵana qaldy. Biz úmit artqan sport túrlerinen synǵa túsetin sportshylarmyzdyń barlyǵy jarysty sátsiz aıaqtap jatyr.

Búgin de el atynan synǵa túsken atletterimiz kóz qýantarlyq nátıjelerge qol jetkize almady.

Aıtalyq, búgin erler arasynda taý shańǵy sportynyń slalom baǵdarlamasynan synǵa túsken Zahar Kýchın birinshi múmkindiginde máre syzyǵyn 1:03,68 kórsetkishimen 43-shi bolyp kesti. Nátıjesinde úzdik 30 sportshy qataryna kire almady.

Al ekinshi múmkindiginde máre syzyǵyn 2:02,66 ýaqyt kórsetkishimen 36-shy bolyp kesip ótti. Osylaısha jarysty sátsiz aıaqtady. Bul Zahar Kýchınniń Beıjiń Olımpıadasyndaǵy sońǵy jarysy edi.

Sporttyń bul túrinen bas júldeni frantsııalyq Klement Noel (1:44,09) jeńip alsa, ekinshi orynǵa Avstrııa ókili Iohannes Shtrolts (– 1:44,70) qol jetkizdi. Al úzdik úshinshi orynǵa norvegııadyq Sebastıan Foss Sýlevog (– 1:44,79) ıe boldy.

Sondaı-aq, búgin shańǵy jarysynan áıelder arasyndaǵy komandalyq sprıntten jartylaı fınaldyq jarystar ótti. Bul synda el namysyn Nadejda Stepashkına men Ksenııa Shalygına qorǵady. Ókinishke qaraı ekeýi máre syzyǵyn 24:57,5 ýaqyt kórsetkishimen 10-shy bolyp kesip ótti. Osylaısha otandastarymyz fınalǵa óte almady.

Jarys sońynda búgin short-trekten synǵa túsken Olga Tıhonovadan úmit kútkemiz. Ol 1500 qashyqtyqta synǵa tústi.

Atalǵan qashyqtyqty otandasymyz 2:23,48 ýaqyt kórsetkishimen tórtinshi bolyp kesip ótti. Alaıda, onyń jarys barysynda ereje buzǵany anyqtalyp jarystan shettetildi.

Osylaısha ol Beıjińdegi Olımpıada oıyndaryn júldesiz aıaqtady. Bul qazaqstandyq sportshylardyń short-trekten Beıjiń Olımpıadasyndaǵy sońǵy jarysy edi.

Aıta ketelik, short-trekten Qazaqstan komandasynyń eń úzdik nátıjesin Abzal Ájiǵalıev tirkedi. Ol 500 metrge júgirýden A fınalynda synǵa túsip, tórtinshi oryn ıelendi.

Beıjiń Olımpıadasy 20 aqpanda máresine jetedi.