Beıjiń-2022: Búgin medal alýǵa úmit oıanǵan kún boldy
NUR-SULTAN. QazAqparat - Búgin Beıjiń Olımpıadasynyń besinshi kúni jankúıerlerge medalǵa degen úmit oıanǵan kún boldy, dep habarlaıdy QazAqparat tilshisi.
Búgin, ıaǵnı 9 aqpan kúni qazaqstandyq atletter sporttyń úsh túri boıynsha jarys jolyna shyqty. Jarys kestesine sáıkes eń áýeli taý shańǵysynan áıelder arasyndaǵy básekege kóz tiktik. Bul synda Olımpıada debıýtanty 18 jastaǵy Aleksandra Troıtskaıa el namysyn qorǵady. Ókinishke qaraı jas sportshymyz alǵashqy Olımpıadasynda máre syzyǵyna jete almaı, jarys jolynan shyǵyp qaldy.
Odan keıin shańǵy qossaıysynan ótken jarystarǵa úmitpen qaradyq. Bul dodada Shyńǵys Rakparovqa úmit artqan edik. Ol birinshi saıysynda ortasha tramplınnen 79,5 metrge sekirip, 38-orynǵa (69,9 upaı) ıe bolsa, ekinshi 10 shaqyrymdyq iz kesý jarysynda jeńimpazdan jeti mınýtqa artta qalyp, jalpy esepte 41-orynǵa ıe boldy. Endi ol úlken tramplındegi jarysqa qatysady.
Bul synda bas júldeni germanııalyq Vınzents Geıger jeńip alsa, ekinshi oryndy Norvegııa shańǵyshysy Iorgen Nıýland Grobak qanjyǵasyna baılady. Al úzdik úshtikke avstrııalyq Lýkash Greıderer ıe boldy.
Búgingi kúnniń sońǵy jarystaryn short-trekshilerimiz aıaqtady. Jaı ǵana jeńilispen aıaqtaǵan joq, medalǵa degen úmitimizdi oıatyp, rýhymyzdy serpiltip baryp jarys másesin kesti.
Naqtyraq aıtsaq, short-trekten 1500 metrlik jarysta el namysyn Denıs Nıkısha men Ádil Ǵalıahmetov qorǵady. Shırek fınalda ekeýi bir topqa tústi. Ókinishke qaraı, Denıs Nıkısha jarys kezinde qulap qalyp, eskertý aldy. Ol ózimen birge kanadalyq sportshyny da jarys jolynan yǵystyrǵan bolatyn. Al Ádil Ǵalıahmetov topta ekinshi oryn ıelenip, jartylaı fınalǵa joldama aldy.
Jartylaı fınalda qytaılyq sportshy Ádildi ıterip jibergen, sol úshin ol jazalanyp, Ǵalıahmetov fınalǵa joldama aldy. Degenmen fınalda qazaqstandyq sportshy 8-oryn aldy. Osylaısha Ǵalıahmetov jankúıerlerin bir serpiltip, medalǵa degen úmit otyn jaqqandaı boldy.
Sondaı-aq, búgin short-trekten 1000 metrge júgirýden áıelder arasyndaǵy irikteý jarystary ótti. Bul synda el namysyn Olga Tıhonova qorǵady. Ol jarys barysynda qarsylasyna soqtyǵysyp, qulap qaldy. Osy sebepti tóreshiler Tıhonovany jarystan shettetti. Dese de, ol atalǵan qashyqtyqty 1 mınýt 56 sekýndta júgirip ótti. Endi qazaqstandyq sportshy 16 aqpan kúni 1500 metrge júgirýden synǵa túsedi. Demek, áli de júldegen talasýǵa múmkindigi bar.
