Beıjiń-2022: Bir kúnde 55 adam koronavırýs juqtyrdy
Uıymdastyrý komıteti bul - delegatsııalar kelgeli bir kúnde tirkelgen eń joǵary kórsetkish ekenin aıtyp dabyl qaqty.
Búginge deıin Olımpıada oıyndaryna kelgen 300-ge jýyq adamnan koronovırýs belgileri baıqalǵan.
Qazirgi tańda onyń barlyǵy uıymdastyrý komıtetiniń talaptaryna saı karantınge jatqyzylyp, tekserilýde. Olardyń qatarynda sportshylar da bar.
Olımpıada oıyndaryn uıymdastyrý komıtetiniń basty talaby - Beıjińge kelgenge deıin vaktsına alǵan bolýy shart.
Sonymen qatar olar Qytaıǵa barǵanǵa deıin bir jáne kelgen soń 2 ret PTR test tapsyrýǵa mindetti.
Olımpıada oıyndarynda sportshylarǵa tártip qatal. Ár delegatsııa músheleri kún saıyn synaqtan ótip otyrýy tıis.
Test nátıjesi oń nátıje bergen jaǵdaıda Olımpıadaǵa qatysý quqyǵynan aıyrylady.
Qazaqstandyq sportshylar búgin frıstaıl-mogýldan alǵashqy irikteý jarysyn ótkizdi. Ázirge jerlesterimizden kovıd tabylǵan joq.
Aıta keteıik, Aq Olımpıadanyń resmı ashylý rásimi erteń Nur-Sultan ýaqytymen 17:55 te bastalady.
Saltanatty sharany «Habar», «Qazaqstan», «Qazsport» jáne «Elarna» telearnalary tikeleı efırden kórsetedi.
