Beıjiń-2022: Anastasııa Gorodko fınalǵa qol sozym jerde qaldy
NUR-SULTAN. QazAqparat - Qytaı astanasy Beıjiń qalasynda ótip jatqan qysqy Olımpıada oıyndarynda qazaqstandyq 16 jastaǵy Anastasııa Gorodko áıelder arasynda frıstaıl-mogýldan laıyqty nátıjege qol jetkizdi, dep habarlaıdy QazAqparat tilshisi.
Óziniń ekinshi irikteý áreketinde ol 67.47 ball jınady. Osylaısha Olımpıadanyń eń jas qatysýshysy 11-orynǵa turaqtady. Nátıjesinde dúbirli dodanyń fınalyna shyǵýǵa qol sozym jerde qaldy.
Eske salsaq, elimizdiń atynan ıÝlııa Galysheva fınalda baq synaýǵa múmkindik aldy.
Ol Qazaqstan quramasynan júldege basty úmitker sanalady.
Aq Olımpıadada elimizdiń atynan 34 sportshy 87 joldama boıynsha synǵa túsedi. Mamandardyń aıtýynsha, qazaqstandyq sportshylar frıstaıl-mogýl, frıstaıl-akrobatıka, short-trekte júlde qoryn tolyqtyrýy múmkin.
