Beıtanys qyzben tanysamyn dep kóliginen aıyrylyp qala jazdady
ASTANA. 7 jeltoqsan. QazAqparat /Aıdar Ospanalıev/ - Astana turǵyndarynyń biri beıtanys qyzben tanysamyn dep kóliginen aıyrylyp qala jazdady. Bul oqıǵa jóninde búgin jýrnalıstermen bolǵan brıfıngte Astana qalalyq Іshki ister departamentiniń Memlekettik til jáne aqparat bóliminiń bastyǵy Nurdildá Oraza málim etti.
Onyń aıtýynsha, ishki ister departamentine 1987 jyly týǵan L. atty azamattan shaǵym túsken. Ol shaǵymynda 4 jeltoqsan kúni túngi 23-00 shamasynda qaladaǵy Ekibastuz kóshesinde belgisiz bireýdiń «Nokıa-6700» uıaly telefony men «Toıota» kóligin tartyp alǵandyǵyn kórsetken. Shaǵym túsisimen ishki ister departamentinde arnaıy jedel-tergeý toby qurylyp, tártip saqshylary atalmysh qylmysty ashýdyń barlyq joldaryn qarastyrdy. Osydan soń urlanǵan kóliktiń Aqmola oblysyna baǵyt alyp bara jatqany málim bolyp, kúdikti Tselınograd aýdanynyń Lýgovoe selosynda izi sýymaı ustalady.
«Keıin málim bolǵanyndaı, zardap shegýshi azamat 4 jeltoqsan kúni úıinde otyrǵan. Osy sátte onyń uıaly telefonyna belgisiz bir qyz túngi saǵat 22-00 shamasynda ózimen tanysqysy keletindigin aıtyp, birneshe sms habar jibergen. Osydan soń zardap shegýshi qyz aıtqan meken-jaı boıynsha 40-stansyǵa bet alady. Jolda oǵan belgisiz bir jigit telefon shalyp, ózin álgi qyzdyń aǵasymyn dep tanystyrady da oǵan óziniń jol kórsetip otyratyndyǵyn aıtady. Álgi jigittiń keńesi boıynsha júrip otyrǵan zardap shegýshi qajetti jerine kelip toqtaǵanda, oǵan bet- álpeti kavkazdyqqa uqsaıtyn bir jigit kelip, aldyńǵy orynǵa otyrady da tapansha kezenip, kólik ıesine kólikten shyǵýdy talap etedi. Sóıtip, kóliginen aıyrylǵan jigit aıdalada qala bergen», dedi N.Oraz.
Atalmysh áreketti iske asyrǵan azamat qolǵa túsip, japa shekken azamattyń kóligi men uıaly telefony qaıtaryldy.
Bul áreket boıynsha qylmystyq is qozǵaldy.
