Beıtanys áıeldi pyshaqtap óltirgen aqtóbelik májbúrli túrde emdeledi
AQTÓBE. QazAqparat - Aqtóbe oblysynyń qylmystyq ister jónindegi mamandandyrylǵan aýdanaralyq sotynda sottalýshy Q.T.Almashevqa qatysty is qaraldy. Oǵan Qylmystyq kodekstiń «Adam óltirý» babymen aıyp taǵyldy, dep hsbarlaıdy QazAqparat tilshisi.
Іs materıalyna súıensek, sottalýshy Q.T.Almashev 2020 jyldyń 2 qyrkúıegi kúni saǵat 22:30-da Aqtóbe qalasyndaǵy turǵyn úılerdiń birine zańsyz kiredi. Ol edende uıyqtap jatqan jábirlenýshini kórip, denesiniń ár jerine pyshaq suǵyp, jaraqattady. Saldarynan jábirlenýshi aýrýhanaǵa barar jolda kóp qan joǵaltyp, kóz jumǵan.
«Sot qaýlysymen Q.T.Almashevtyń aqyl-esi durys emes, qylmysty da sondyqtan jasaǵan dep tanyldy. Sot Qylmystyq kodekstiń 95-babynyń 4-bóligi negizinde Q.T.Almashevqa mamandandyrylǵan úlgidegi psıhıatrııalyq statsıonarda májbúrlep emdeý sharasyn qoldandy. Q.T.Almashevqa qatysty qylmystyq qýdalaý toqtatyldy, ol qylmystyq jaýapkershilikten bosatyldy.
Sot qaýlysynyń oryndalýy Aqtóbe oblysynyń densaýlyq saqtaý basqarmasyna júkteldi. Qaýly zańdy kúshine engen joq», - dep habarlady Aqtóbe oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
