Beısenbide Qazaqstannyń basym bóliginde jańbyr jaýady
ASTANA. QazAqparat - 7 maýsymda atmosferalyq aǵyndardyń ótýine baılanysty Qazaqstannyń basym bóliginde naızaǵaıly jaýyn-shashyn jaýady, tek soltústik-shyǵysta jáne ońtústik-shyǵysta kún raıy ashyq bolady, dep habarlaıdy Qazgıdromet.
Elimizdiń keı jerlerinde jel kúsheıedi, ońtústikte shańdy daýyl soǵady, sondaı-aq soltústik-batysta burshaq jaýýy yqtımal.
Aqtóbe, Qostanaı, Soltústik Qazaqstan, kúndiz Mańǵystaý, Atyraý, Batys Qazaqstan, Qaraǵandy, Shyǵys Qazaqstan, Qyzylorda, Ońtústik Qazaqstan, Jambyl oblystarynyń keı jerlerinde jeldiń jyldamdyǵy sekýndyna 15-20 metrge údeıdi.
Qyzylorda oblysynda shańdy daýyl soǵady, Qostanaı oblysynda burshaq jaýýy yqtımal.
Kúndiz Almaty oblysynyń basym bóliginde, Atyraý, Qyzylorda, Qaraǵandy oblystarynyń keı jerlerinde qatty aptap ystyq kútiledi.
Mańǵystaý, Atyraý, Qyzylorda oblystarynyń basym bóliginde, Batys Qazaqstan, Aqtóbe, Ońtústik Qazaqstan, Jambyl, Shyǵys Qazaqstan oblystarynyń keı jerlerinde óte joǵary órt qaýpi saqtalady.
