Beısenbi kúni 6 óńirde qatty ystyq saqtalady

NUR-SULTAN. QazAqparat – 1 qyrkúıekte Qazaqstannyń basym bóliginde bultty jáne qurǵaq aýa raıy kútiledi. Tek soltústik-batysta, soltústikte atmosferalyq fronttardyń ótýine baılanysty naızaǵaı oınap, jańbyr jaýady. Respýblıka boıynsha keı jerlerde jel kúsheıedi. QazAqparat bul týraly «Qazgıdrometke» silteme jasap habarlaıdy.

Atap aıtqanda, Qyzylorda, Túrkistan, Aqtóbe oblystarynyń basym bóliginde, Atyraý oblysynyń batysynda, ońtústiginde, Batys Qazaqstan oblysynyń ońtústiginde, soltústiginde, shyǵysynda, Abaı, Qostanaı, Qaraǵandy oblystarynyń ońtústiginde tótenshe órt qaýpi boljanady.

Kúndiz Atyraý, Batys Qazaqstan, Aqtóbe, Qostanaı, Qaraǵandy, Ulytaý oblystarynyń basym bóliginde qatty ystyq saqtalady.