Beısenbaev: Qazaqstan óndiris pen eksporttyń kúrdeliligi jóninen Ózbekstan men Grýzııadan da tómen tur

ASTANA. KAZINFORM — Qazaqstan óndiris pen eksporttaǵy ǵylym men tehnologııanyń úlesin sıpattaıtyn ECI reıtıngisinde Ózbekstan men Grýzııadan da tómen orynda tur.

Bul týraly Májilis depýtaty Elnur Beısenbaev ǵylym zańnamasyn jetildirýge arnalǵan jıynda aıtty.

— ECI deıtin kórsetkish bar, óndiris pen eksporttyń kúrdeliligin sıpattaıdy, ıaǵnı syrtqa shyǵatyn taýarlardaǵy ǵylym men tehnologııanyń úlesin kórsetedi. Mendegi aqparat boıynsha Qazaqstan qazir 84 orynda tur. Bizdiń aldymyzda Ýkraına 51 orynda tur. Soǵys bolyp jatqan memleket bul. Odan qalsa, 70 orynda Grýzııa tur. Tipti Ózbekstan bizdiń aldymyzda — 80 orynda. Bul endi shyntýaıtynda bizdiń ǵylymnyń jaǵdaıyn kórsetedi, — dedi ol.

Depýtat Ǵylym akademııasy ǵalymdar oılap tapqan jańalyqtardy óndirispen ushtastyrýda sylbyr jumys istep otyrǵanyn aıtyp synady. 

— Biz ár túrli kásiporyndarmen kezdesemiz. Sonda olardan suraǵanda Ǵylym akademııasy eshbir usynys jasamaǵanyn aıtady. Bir de bir kásiporyn, bir de bir mekeme Ǵylym akademııasy ınvestıtsııa surap kelgenin aıtqan joq. Qazaqstanda 1500 ónerkásip kásiporny bar. Onyń 50 paıyzy taý-ken kásiporyndary. Qazaqstan ekonomıkasyndaǵy búkil aqshanyń 50 paıyzy sol kásiporyndarda shoǵyrlanǵan. Solarǵa bir de bir usynys joq. Investıtsııany memlekettik bıýdjetten ǵana izdeýdiń keregi joq. Solarda da ınvestıtsııa izdeýge bolady, — dedi Elnur Beısenbaev.

Buǵan deıin Astanada kómir tehnologııasy ulttyq ǵylymı ortalyǵy ashylýy múmkin ekenin jazǵan edik.