Beısen Tájibaev: Jańa Qazaqstandy qurýǵa atsalysý – halqymyzǵa ortaq mindet

TÚRKІSTAN. QazAqparat - Memleket basshysy Qasym-Jomart Toqaevtyń Qazaqstan halqyna arnaǵan Joldaýy – el tarıhyndaǵy erekshe bastamalarǵa, ońdy ózgeristerge toly kezeńniń bastaýy boldy dep sanaımyn. «Amanat» partııasy Túrkistan oblystyq fılıalynyń Atqarýshy hatshysy, fraktsııa jetekshisi Beısen Tájibaev osyndaı pikirin bildirdi, dep habarlaıdy QazAqparat.

«Qańtar oqıǵasy» degen ataýmen tarıhta qalǵan syndarly sáttiń órbýi men saldaryn, sebepterin arqaý etý arqyly bastalǵan Joldaý halyqqa rasynda serpilis, senim syılady. «Saıası transformatsııa búkil salada tamyr-tanystyq pen monopolııany túbirimen joıyp, adal ári ádil «oıyn erejesin» qalyptastyrýdy kózdeıdi» dep memlekettik basqarý júıesine engizýlige tıisti ári tıimdi bolatyn bastamalardy tizbektep berdi», - deıdi ol.

Onyń aıtýynsha, elimizdiń saıası modelin qalyptastyrý úshin qıyn da bolsa kúrdeli qadamdarǵa barý basty ustanym bolýy kerektigin aıtqan Prezıdent, Parlamenttiń tómengi palatasyna zań qabyldaý mártebesin berý kerektigin málimdedi. Bul túptep kelgende Sýperprezıdenttik basqarý formasy ózgerip, Parlamenti qýatty memleketti qalyptasyrýdyń alǵysharty bolary anyq.

«Oblys ákimderin taǵaıyndaý – óńirlerdi damytý isindegi basty basymdyq beretin jaǵdaı ekeni aıan. Aldaǵy ýaqytta bul úrdis máslıhattardyń áleýetin kúsheıtý arqyly oblys ákimdigine 2 nemese odan da kóp kandıdattyń usynylyp, solardyń arasynan balamaly túrde tańdaý jasaý arqyly júzege asyrý kózdelýde», - dedi Beısen Tájibaev.

Fraktsııa jetekshisiniń sózinshe, «Amanat» partııasynyń 1 naýryzdaǵy sezinde bıylǵy jyly Prezıdent partııa tóraǵalyǵynan ketetini jaıly aıtqan ustanymyna Joldaý barysynda taǵy da toqtaldy. Sonymen qatar, oblys ákimderi men orynbasarlary partııanyń óńirlik fılıaldary tóraǵalyǵynan ketip, partııa músheliginde bolmaıtyny da aıtyldy.

«Bul óz kezeginde partııalyq shynaıy básekeni, músheleri úshin úlken múmkindikter týdyrady dep kútilýde. Saılaý týraly Zańnyń da tarmaqtary qaıta qaralyp, Májilis, máslıhat depýtattaryn saılaýda 70% partııalyq, 30% majorıtarlyq júıege negizdemekshi. Bul halyqtyń saılaýǵa degen senimin arttyryp, óz tańdaýyn erkin jasaýǵa múmkindik týdyrady», - deıdi ol.

B.Tájibaev aıtyp ótkendeı, Memleket basshysy álemde bolyp jatqan geosaıası oqıǵalaradyń áserinen týyndaǵan krızıstik jaǵdaılar el ekonomıkasyna, áleýetine qaýip tóndirmeýi tıistigin eskertip, qýatty el qurýdyń negizgi baǵyttaryn atady.

«Búgingi Joldaý ákimshilik-aýmaqtyq ózgeristerge alyp keletin negizgi aıshyqty oılarmen de erekshelendi. Tarıhı tamyrǵa súıene otyryp, Almaty, Shyǵys Qazaqstan, Qaraǵandy oblystaryn ekige bólip, Ulytaý, Abaı, Jetisý oblystaryn qurý týraly sheshimi – halyq kútken, kóńilge qonymdy is bolǵaly tur. Bul – tek dástúrli sabaqtastyǵymyzdy saqtaý ǵana emes, sol aýmaqtaǵy halyqtyń búgingi turmysyna da aıtarlyqtaı oń ózgeris alyp keleri anyq. Biz buǵan Túrkistan oblysyn qurý tájirıbesinen tolyqtaı kóz jetkizdik.

Sonymen birge Prezıdent Joldaýda jýrnalıster «syrttan berilgen tapsyrystarmen jumys istemeýi kerek» dep, ulttyq baspasózdiń jaýapkershiligin eseleı tústi. Memleket múddelerin, qoǵam qajettiligin jáne medıa salasyndaǵy ózgeristerdi eskere otyryp «Buqaralyq aqparat quraldary týraly» zańdy ózgertý kerektigin eske saldy.

Ulttyq quryltaı qurý týraly ıdeıasy da eldiń kóńilinen shyǵatyny aıqyn.

Qalaı desekte, búgingi Joldaý el tarıhyna altyn árippen jazylatyn, «Jańa Qazaqstan» tujyrymdamasyn isker asyrýdyń basty, qundy qujaty retinde sanalary anyq. El Prezıdentiniń «Ýaqyt qanshalyqty qıyn bolsa da, biz óz baǵytymyzdy ózgertpeımiz» dep senimmen aıtýy – Memleket tutastyǵyn nyǵaıtýǵa shaqyrǵan úndeýi dep túsindik. Endi bizdiń aldymyzda Memleket basshysynyń «Biz ózimizdiń basty ıgiligimiz – Táýelsizdigimizdi saqtaýǵa, ulttyq biregeılik negizderin bekemdeýge, elimizdi transformatsııalaýǵa jumylýǵa tıispiz» degen ustanymy aıasyna toptasyp, el birligin nyǵaıtyp, «Jańa Qazaqstan» qurýǵa birlese atsalysý mindeti tur!» - deıdi Beısen Tájibaev.