Beısen Quranbektiń baǵdarlamasy «Úzdik áleýmettik joba» atandy
ASTANA. QazAqparat - «Tumar» ulttyq televızııalyq báıgesinde «Úzdik áleýmettik joba» nomınatsııasynyń jeńimpazy belgili boldy, dep habarlaıdy «QazAqparat» HAA tilshisi.
«Tumar» báıgesin tapsyrý saltanatynda «Úzdik derekti kıno» nomınatsııasy boıynsha - «Tak moglo byt» derekti fılmin túsirgen «365.Sınema» kınokompanııasy jeńimpaz atandy. Al «Úzdik televızııalyq serıal» nomınatsııasy boıynsha - «Asyl arman» serııalyn túsirgen «Astana» telearnasy úzdikter qatarynan kórindi.
Sonymen qatar, «Úzdik áleýmettik joba» nomınatsııasy boıynsha - «Qareket» baǵdarlamasy top jardy. «Qazaqstan» ulttyq arnasynyń biregeı baǵdarlamasyn elimizge belgili telejýrnalıst Beısen Quranbek júrgizedi.
«Elordanyń 20 jyldyǵyna oraı erekshe báıge» nomınatsııasy boıynsha - «Meniń Astanam» jobasy boıynsha «Qazaq TV» telearnasy jeńimpazdardyń qataryn tolyqtyrdy. Jeńimpazǵa syılyqty QR Premer-Mınıstriniń orynbasary Asqar Jumaǵalıev tabys etti.
Al «Televıdenıeniń 60 jyldyǵy - televızııaǵa qosqan úlesi úshin» nomınatsııasy boıynsha - Sovet Masǵutov marapattaldy.
Aıta ketsek, Astanada ótip jatqan «Tumar» ulttyq televızııalyq báıgesiniń saltanatty rásiminde QR Memlekettik hatshysy Gúlshara Ábdiqalyqova Elbasy Nursultan Nazarbaevtyń quttyqtaýyn oqyp berdi.
Eske sala ketsek, «Tumarǵa» ótinimderdi qabyldaý tolyǵymen avtomattandyrylyp, kaztube.kz portalynyń negizinde júzege asyrylǵan bolatyn. Báıgege qatysýshylardyń joǵary belsendilikterin atap ótý kerek. Ótinimderdi qabyldaý kezeńinde kaztube.kz portalyna kirýshiler sany 80%-ǵa ósti, al ótinimder sany byltyrǵy kórsetkishke qaraǵanda 1,6 esege artty (240 ótinim).
2018 jyly «Tumarǵa» 397 konkýrstyq jumys kelip tústi. Olardyń ishinde qazylar alqasy Báıge erejesiniń talaptaryna sáıkes rásimdelgen 355 konkýrstyq ótinimdi qaraý úshin qabyldady.
Aǵymdaǵy jylǵy báıgege 14 nomınatsııa boıynsha ótinimder qabyldaý 15 qańtar men 1 naýryz aralyǵynda júrgizilgen.
