Beısen Quranbek Taldyqorǵan qalasynyń qurmetti azamaty atandy
TALDYQORǴAN.QazAqparat - Búgin taldyqorǵandyqtar sán-saltanatpen qala kúnin toılap jatyr. 172 myńǵa jýyqtaǵan shahar turǵyndaryn Almaty oblysynyń ákimi Amandyq Batalov quttyqtap, jyly lebizin bildirdi, dep habarlaıdy QazAqparat tilshisi.
Búginde Taldyqorǵan qaryshtap damyp kele jatqan qala. Sońǵy segiz aıda ónerkásip óniminiń kólemi 43,3 mlrd teńgege jetti. Qala ekonomıkasyna 29,8 mlrd teńgeden astam ınvestıtsııa tartyldy. Oblys ortalyǵynda qurylys qarqyndy. Bıyldyń ózinde «Nurly jer» baǵdarlamasy aıasynda 168 páterlik kommýnaldyq 64 páterlik nesıelik úı paıdalanýǵa berildi. Bul jóninde oblys ákimi óziniń quttyqtaýynda atap ótti. Igi dástúr boıynsha qalanyń ósip-órkendeýine úles qosqan, belsendi azamattarǵa «Taldyqorǵan qalasynyń qurmetti azamaty» ataǵy berildi. Olardyń qatarynda Qazaq kınosynyń altyn qorynan oryn alǵan «Taqııaly perishte» fılmindegi Taılaqtyń rólin somdaǵan akter, QR Mádenıet qaıratkeri, Almaty oblysynyń qurmetti azamaty Álimǵazy Smaǵululy Raıymbekov, «K LACTIS LTD» JShS basshysy, qalalyq máslıhat depýtaty Baqyt Erǵazyuly Arqabaev, «Jetisý» oblystyq telearnasynyń dırektory, halyqtyń súıikti habaryna aınalǵan «Aıtýǵa ońaı» baǵdarlamasynyń júrgizýshisi Beısen Abaıuly Quranbek jáne Rıo Olımpıadasynyń júldegeri, aýyr atlet Karına Gorıcheva da bar.
