Beısen Quranbek áleýmettik jelide óleń oqý estafetasyn bastady

ASTANA. QazAqparat - Almaty oblysynda «Jetisýdyń jyr kerýeni» jobasy iske asyrylýda. Jobanyń maqsaty Jetisý jerinde kindik qany tamǵan aqyn-jazýshylardy kópshilikke tanytý, olardyń shyǵarmalaryn áleýmettik jeliler arqyly el arasynda nasıhattaý. Bul týraly Óńirlik kommýnıkatsııalar qyzmeti alańynda oblystyq tilderdi damytý basqarmasynyń basshysy Aıdar Bashbaev málimdedi.

Joba erejesi boıynsha, belgili bir tulǵa ózi mánerlep oqyǵan óleńdi beınejazbaǵa túsirip, áleýmettik jelige júkteıdi. Keıin óleń oqý estafetasyn ózi tańdaǵan oqyrmanǵa usynady.

«Jobany júzege asyrý barysynda jyr estafetasyn belgili jýrnalıst, «Aıtýǵa ońaı», «Qaraket» baǵdarlamalarynyń júrgizýshisi, oblystyq «Jetisý» telearnasynyń dırektory Beısen Quranbek bastady. Ol Almaty oblysynyń týmasy, aqyn Jumataı Jaqypbaevtyń «Láılá» óleńin oqyp, áleýmettik jeli oqyrmandaryna usyndy. Búgingi kúni Instagram áleýmettik jelisinde óleń 30 myńnan astam qaralym jınap, oǵan 200-den asa pikir qaldyryldy. Al Feısbýk jelisinde 5 myńnan astam ret qaralyp, 100-den asa pikir jazyldy», - dedi A.Bashbaev.

Aıta keteıik, atalmysh jobany 15-ke jýyq adam qoldap, áleýmettik paraqshalaryna júktedi.