Beısembaı Kenjebaıulynyń bes tomdyq shyǵarmalar jınaǵynyń alǵashqy tomy jaryqqa shyqty
ASTANA. 9 aqpan. QazAqparat - Qazaq ádebıeti tarıhyn «Túrik qaǵanaty» dáýirine deıin ilgeriletýge muryndyq bolǵan, sol jolda 1941-1987 jyldar aralyǵynda shekpegen azaby joq aıtýly azamat,
taımas tabandy ǵalym, qazaq túrkologııasy basynda turǵan uly túrkitanýshy, ulttyq fılologııanyń iri qaıratkeri Beısembaı Kenjebaıulynyń bes tomdyq shyǵarmalar jınaǵynyń «Túrik qaǵanatynan búgingi kúnge deıin...» dep atalatyn alǵashqy tomy jaryqqa shyqty.
Qazaq ádebıeti tarıhyn «Orhon-Enıseı rýna jazýlarynan» taratyp qazaq ádebıeti tarıhynyń túrki halyqtaryna ortaq dáýirleri men ózine ǵana tán damý belesterin kezeń-kezeńi boıynsha júıeli taldaıtyn eńbekterden bas quraǵan bul kitaptyń tili - qunarly, aıtary - aıqyn.
1-tomda ǵalymnyń «Erte dáýirlerdegi ádebıet nusqalary», «Qazaq ádebıetiniń tarıhyn dáýirleý», «Dıvanı Luǵat-at Túrik», «Qıssa-sul Ánbııa», «Kodeks Kýmanıkýs», «Muhabbatnama» atty ǵylymı maqalalary qamtylǵan. Sondaı-aq «Qazaq handyǵy tusyndaǵy ádebıet», «Qazaq óleńiniń qurylysy», «HІH ǵasyrdaǵy qazaq ádebıeti», «HH ǵasyr basyndaǵy qazaq ádebıeti» jáne basqa da maqalalary engen. Abaı Qunanbaıuly, Ybyraı Altynsarın, Shoqan Ýálıhanov, Aqmolla aqyn, Sultanmahmut Toraıǵyrov, Muhametjan Seralın, Áset Naımanbaev, Bernııaz Kúleev, Maqysh Qaltaev, Ákiram Ǵalymov týraly zertteýleri jarııalanyp otyr.
Redaktsııalyq alqa quramyna Ý.Qalıjan (tóraǵa), M.Joldasbekov, Á.Kekilbaı, T.Kákishuly, N.Kelimbetov, Q.Ergóbek (jaýapty) syndy ǵalym-jazýshylar engen. Pikir jazǵandar - D.Isabekov pen R. Nurǵalıuly.
Kitaptyń basynda jáne sońynda belgili ǵalym, professor Qulbek Ergóbektiń oı-tolǵamdary berilgen. Beısembaı Kenjebaıulyna arnaǵan sózinde Q.Ergóbek: «Otyzynshy jyldary Siz Abaıdan keıingi asqar belimiz - Sultanmahmutty taný, tanytýymen shuǵyldandyńyz. Qazaq ádebıeti kógine jarq etip kóterilip, az turyp, aǵyp túsken Sultanmahmut. Siz - aqynnyń ǵylymı ómirbaıanyn túzýshisiz. Siz - aqynnyń ádebı murasyn jınaqtap, hronologııalyq turǵydan júıeleýshisiz. Siz - 1941, 1950, 1957, 1962, 1987 jyldary aqyn murasyn mátindik súzgiden ótkizip bir, eki tom etip qurastyryp, jaryqqa shyǵarýshysyz. Kandıdattyq dıssertatsııańyz - osy asaý júrek aqynǵa arnaldy. Sultanmahmuttyń ádebı murasyn zertteýdegi jetistigińiz qatelikke balanyp, 1953 jyly KOKP qatarynan shyǵaryldyńyz, Muhtar Áýezovpen birge - bir buıryqpen jumystan qýyldyńyz. Siz Sultanmahmuttanýdy zertteý ocherkinen mańyzdy monografııaǵa deıin ulastyra júrgizdińiz» dep jazady.
Eki myń dana taralymmen shyqqan bul jınaqtyń kólemi 20 baspa tabaqtan turady.
