Beısbol matchynda boı kórsetken Golovkınge jurt narazylyq bildirdi

ASTANA. QazAqparat - Los-Andjeleste «Los-Andjeles Dodjers» kásipqoı beısbol klýbynyń «Kolorado Rokıs» komandasyna qarsy oıyny ótti. Match aldynda dopty saltanatty laqtyrý rásimin qazaqstandyq boksshy Gennadıı Golovkın ótkizdi. Alaıda, «Los-Andjeles Dodjers»-tyń barlyq derlik jankúıerleri Golovkınniń alańda paıda bolýyna qýanyshty bolǵan joq, dep habarlaıdy QazAqparat Sports.kz-ǵa silteme jasap.

«Dodger Stadium-da GGG-ge ysqyryp, narazylyq bildirildi», - dep jazdy Los Angeles Times-tiń jergilikti tilshisi Tvıtterde.

Aıta keteıik, Los-Andjeles halqynyń 47 paıyzyn latynamerıkalyqtar quraıdy. Olardyń deni Golovkın-Alvares jekpe-jeginde meksıkalyq boksshyǵa jankúıer bolatyny daýsyz.

Eske salaıyq, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn.

Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıek kúni tańerteń kórsetiledi.