Beırýttaǵy joıqyn jarylys: 60-tan astam adamnyń jaǵdaıy aýyr

«Jarylys kezinde zardap shekken 60-tan astam adamnyń jaǵdaıy aýyr», - dep habarlaıdy telearna.

Al Mayadeen telearnasynyń málimetinshe, jarylystan jaraqat alǵan 300-ge jýyq adam Beırýttaǵy Amerıka ýnıversıtetine qarasty medıtsınalyq ortalyqta emdelýde. Sondaı-aq, mert bolǵandardyń denesi de sol ortalyqqa jetkizilgen jáne olardyń jartysyna áli DNQ saraptamasy júrgizilmegen. Odan bólek, lıvandyq BAQ jarylys oryn alǵan aýmaqta ornalasqan 3 aýrýhananyń isten shyqqanyn habarlaıdy.

Keıingi málimetter boıynsha, 100-den astam adam qaza taýyp, 4 myńnan astam turǵyn zardap shekti. Elde aza tutý kúni jarııalandy. Apat aımaǵy dep tanylǵan Beırýtta eki aptalyq tótenshe jaǵdaı rejımi engizildi.

Eske sala ketsek, 4 tamyzda Lıvannyń áskerı-teńiz kúshteri (ÁTK) bazasyna jaqyn Beırýt porty aýdanynda joıqyn jarylys boldy.

Jarylys saldarynan Qazaqstannyń SІM Lıvandaǵy dıplomatııalyq mıssııasy ǵımaratyna zııan kelgen. Jarylys kezinde dıplomatııalyq mıssııanyń qyzmetkerleri jumys kúni aıaqtalǵannan keıin jumys ornynan ketip qalǵan.

Konsýl jumysta qalǵan bolatyn jáne jarylys tolqyny saldarynan jeńil jaraqat aldy.

Buǵan deıin habarlanǵandaı, 5 tamyz kúni Beırýt ýaqytymen saǵat 00:30-da Lıvannyń Densaýlyq saqtaý mınıstri Muhammed Hasan jarylystan qaza tapqandar sany 70-ke jetkenin, 4 myńǵa jýyq turǵyn jaraqat alǵanyn málimdedi.

Álem elderiniń, halyqaralyq uıymdardyń basshylary men premer-mınıstrleri 4 tamyzda Lıvannyń áskerı-teńiz kúshteri (ÁTK) bazasyna jaqyn Beırýt porty aýdanynda bolǵan jarylysqa baılanysty Lıvan halqyna kóńil aıtyp, shuǵyl kómek kórsetýge daıyn ekenin bildirdi.

5 tamyz kúni jarylystyń sebebi anyqtaldy. Bılik málimdemesine sáıkes, ammonıı nıtratynyń úlken partııasy (ammıak selıtrasy dep te atalady) portta uzaq ýaqyt saqtalyp, qaýipsizdik talaptary saqtalmaǵan.

Memleket basshysy Lıvandaǵy qazaqstandyq azamattardyń qaýipsizdigin qamtamasyz etýdi tapsyrdy.