Beırýttaǵy jarylys: qaza tapqandar sany 100 adamnan asty
NUR-SULTAN. QazAqparat – Beırýttaǵy jarylys saldarynan 100-den astam adam mert boldy, dep habarlaıdy QazAqparat.
Buǵan deıin qaza tapqan 78 adam týraly habarlanǵan bolatyn.
Sky News Arabia telearnasynyń málimetinshe, zardap shekken adamdar sany 4 myńnan asqan.
Seısenbi kúni Beırýttaǵy teńiz portynda, Lıvan áskerı teńiz kúshteri bazasyna jaqyn jerde joıqyn jarylys boldy. Jarylý tolqynynan ondaǵan úıler men avtomobılder qıralyp, zaqymdaldy, qaladaǵy kóptegen úılerdiń tereze shynylary syndy.
Jergilikti bıliktiń málimetinshe, jarylysqa keden qyzmetiniń 2015 jyly tárkilegen, sol ýaqyttan beri qoımada saqtalǵan 2,7 myń tonna ammıak selıtrasynyń detonatsııasy sebep boldy. Elde aza tutý kúni jarııalandy. Eki aptalyq merzimge tótenshe jaǵdaı rejımi engizildi.
