Beırýt gýbernatory: jarylys shyǵyny 3-5 mlrd dollardy qurady
BEIRÝT. QazAqparat – Beırýt gýbernatory Marvan Abbýd seısenbi kúni portta bolǵan jarylystyń shyǵyny 3-5 mlrd dollardy quraǵanyn málim etti, dep habarlaıdy QazAqparat LBC telearnasyna silteme jasap.
Abbýdtyń aıtýynsha, oqıǵa ornyna jiberilgen 10 órt sóndirýshi mert bolǵan. Sonymen qatar, júzdegen qala turǵyny baspanasyz qaldy.
Qýatty jarylys Beırýt porty mańynda, Lıvan ÁTK bazasyna jaqyn jerde boldy. Jarylys tolqyny ondaǵan úı men avtokólikti qıratty, el astanasynyń kóp bóligindegi ǵımarattardyń terezesi synǵan. Jergilikti bılik ókilderiniń málimeti boıynsha, 2015 jyly keden qyzmeti tárkilep, qoımada saqtalyp turǵan 2,7 myń tonna ammıak selıtrasynyń detonatsııasy jarylysqa sebep bolǵan.
Keıingi málimetter boıynsha, 100-den astam adam qaza taýyp, 4 myńnan astam turǵyn zardap shekti. Elde aza tutý kúni jarııalandy. Apat aımaǵy dep tanylǵan Beırýtta eki aptalyq tótenshe jaǵdaı rejımi engizildi.
