«Beıpil sózge toly»: Depýtat serıaldar men telebaǵdarlamalardy synǵa aldy
«Soraqylyq tórge ozǵan zaman boldy. Sahnaǵa shyqqan ánshi mas bop sóıledi, boqaýyz da aıtty, qutyldy. Ulttyq qundylyqtardy aıaqasty etkender tek keshirim suraýmen sytyldy. Al balaǵattaý nasıhatqa aınaldy. Onyń aldy telearnalarda júr. «Hıt TV» telearnasynyń Qaz Stand Up's baǵdarlamasy osynyń dáleli. Keıingi kezde mazmuny, konteksi boqaýyz sózderge toly serıaldar qaptap keledi. Dórekelik kórinisteri kınoda ǵana emes, kıno epızodtary arqyly da barlyq áleýmettik jelilerde jeldeı esip júr.
Osydan eki jyl buryn «Qaırat bolma, adam bol» degen serıalda qazaqtyń rýhty esimin jerge taptaǵanyn da kórdik. Olar endi tolyq metrajdy fılm retinde kınoteatrlarǵa shyqty. Sonyń bir kórinisi dál qazir Qazaqstannyń barlyq kınoteatrynda kórsetilip jatqan «Patsanskıe ıstorıı» fılmi. Árıne, 18+, 21+ jas sanatyna arnalǵan mundaı fılmderge eshqandaı shekteý joq. Biraq bul áreketter birtutas ulttyń taǵdyryna, qoǵamǵa, ıdeologııamyzǵa, memlekettik saıasatqa kereǵar áser etip jatqanyn túsinip otyrmyz ba?», - dedi M. Tájmaǵambetova Bas prokýroratýra men Mádenıet jáne sport mınıstrligine joldaǵan saýalynda.
Onyń aıtýynsha, QR kınematografııa týraly zańnyń 8-baby 3-tarmaǵynda «QR aýmaǵynda «21 jastan bastap» jas sanaty bar fılmdi kınozaldar men osy maqsattarǵa arnalǵan ózge de oryndarda jergilikti ýaqytpen saǵat 22:00-den keıin tańǵa 06:00-ge deıin prokatqa shyǵarýǵa jol beriledi» dep naqty kórsetilgen.
«Al bul fılmder kınoteatrlarda keshki saǵat 18:00-den bastap kórsetilip júr. Oń-solyn tanymaǵan jastar, ata-anasynan keshki ýaqytqa suranyp shyqqan jasóspirimder emin-erkin kórip jatyr. Sonda bul zańdy bilmeý me, álde kópe kórineý zańdy belden basý ma? Al jalpy beleń alyp bara jatqan mundaı arzan kúlki, beıpil sóz, belden tómen áńgimelerge toly beınekontentter, fılmder, serıaldar óz aldyna, endi beıádep sahnalar, saıqymazaqqa aınalǵan halyqtyq shyǵarmalar teatrlarda kórsetile bastady», - dedi depýtat.
Onyń paıymynsha, rýhanı ustynymyzdy qaıtsek túgendeımiz dep júrgende, urpaqty dúbara qylatyn mundaı nasıhat jaýdan da qaýipti bolyp tur.
Depýtat kelesideı usynystaryn joldady:
1. Atalǵan kınonyń kınoteatrlarda kórsetilý barysynda zań talaptarynyń buzylýyna jol bergen tıisti mekemelerdi prokýratýra tekserip, tez arada jaýapqa tartýy tıis.
2. Budan bylaı mundaı soraqylyqqa jol bermeý úshin kıno salasy jiti qadaǵalaýǵa alynýy qajet. Tıisti mınıstrlik prokat kýáligin bererde qoǵamdyq pikir men memlekettik saıasat turǵysynan prokatqa shyǵatyn fılmderge talapty kúsheıtýi tıis.
3. Áleýmettik jelidegi jarııalanymdarǵa, teatrǵa jáne basqa da qoǵamdyq oryndarda kópshilik qaýymǵa arnalǵan qoıylymdarǵa sahna ádebine qatysty zań talaptary kúsheıtilýi kerek.
