Beıneýde quny 2,7 mln. teńgeni quraıtyn 500 dana kontrabandalyq djınsy shalbar tárkilendi
MAŃǴYSTAÝ OBLYSY. 26 aqpan. QazAqparat - Beıneý stansasynda «Kýlıab-Máskeý» baǵytyndaǵy jolaýshylar poıyzynan Tájikstan azamatyna tıesili kedendik baqylaýdan jasyrylǵan jáne deklaratsııalanbaǵan, qandaı da bir ilespe qujattarynsyz 500 dana djınsı shalbar tabyldy,
dep habarlaıdy Mańǵystaý oblysy boıynsha Kedendik baqylaý departamentiniń baspasóz qyzmeti.
Sot-taýar saraptamasynyń qorytyndysy boıynsha, taýardyń quny 2,7 mln. teńgeni quraıtyndyǵy anyqtaldy.
Kontrabandalyq shalbarlardy alyp ótpek bolǵan tájik azamaty Keden departamenti men kólik prokýratýrasy qyzmetkerleriniń jedel-izdestirý sharalaryn júrgizý kezinde quryqtaldy.
Qazirgi tańda atalǵan fakti boıynsha Dýshanbe qalasynyń (Tájikstan Respýblıkasy) turǵyny 1965 jyly týylǵan M. atty azamatqa qatysty qylmystyq is qozǵaldy.
