«Beıneý-Jańaózen» gaz qubyryn salý Mańǵystaýdyń 770 myń turǵynyn kógildir otynmen qamtýǵa múmkindik beredi
«Aqtaý qalasy «Jańaózen-Aqtaý» gaz qubyry arqyly kógildir otynmen qamtamasyz etilip otyr. Bul kólem jetkiliksiz. Biz josparlaǵan taǵy bir gaz qubyryn salý qajet. Úkimet atalǵan jobany júzege asyrýǵa 31 mlrd teńge bóldi. Bul kásipkerler úshin de, qaıtadan salynyp jatqan aýdandardyń turǵyndaryna kommýnaldyq qyzmet kórsetý úshin gazdyń qosymsha kólemin berýge múmkindik jasaıdy», - dedi oblys basshysy Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, bıyl Aqtaý energetıkalyq haby aıasynda salynǵan ǵımarattarǵa gaz tartý úshin uzyndyǵy 52 shaqyrym qubyr tartylady. Joba quny 10,5 mlrd teńgeni quraıdy.
«Osy jyldyń sońynda paıdalanýǵa beremiz. Bul is-shara atalǵan qyzmetti úzdiksiz alýǵa múmkindik jasaıdy. «Beıneý-Jańaózen» gaz qubyrynyń uzyndyǵy 308 shaqyrymdy quraıdy. Gaz qubyrynyń quny – 180 mlrd teńge. «Qazaqgaz» ulttyq kompanııasy Energetıka mınıstrligi men Úkimettiń qoldaýymen óz qarajatyna salyp jatyr. Bul gaz qubyry Beıneýdi qosa alǵanda búkil oblysty gazben qamtıdy. Bul – Beıneý turǵyndaryn qospaǵanda 770 myń adam», - dedi Nurlan Noǵaev.
