Beıneý – Mańǵystaý temirjol jobasy qashan aıaqtalady
ASTANA. KAZINFORM – Qazaqstanda kólik-logıstıka ınfraqurylymyn damytý aıasynda «Beıneý – Mańǵystaý» temirjol ýchaskesin jańǵyrtý jumystary qarqyndy júrgizilip jatyr.
Joba Memleket basshysynyń eldiń kóliktik-logıstıkalyq áleýetin arttyrý jónindegi tapsyrmalaryn oryndaý sheńberinde júzege asyrylýda.
– Jobanyń negizgi maqsaty – magıstraldyq ınfraqurylymdy jańǵyrtý, temirjol jelisiniń ótkizý qabiletin arttyrý jáne poıyzdardyń qaýipsiz ári turaqty qozǵalysyn qamtamasyz etý, – delingen Kólik mınıstrliginiń habarlamasynda.
Qazirgi ýaqytta razezderdiń basym bóliginde negizgi jer jumystary aıaqtalǵan.
Mamandar rels-shpal torlaryn tóseý, joldardy ballastaý, baǵyttaýysh burmalardy ornatý jáne temirbeton sý ótkizý qubyrlaryn uzartý jumystaryn jalǵastyryp jatyr.
№12 razezde kópir qurylysy júrgizilýde.
– Nysanda irgetas elementteri men temirbeton tireýler montajdalyp, qalyptardy ornatý jumystary oryndaldy, – dep habarlandy.
Sonymen qatar dabyl berý, ortalyqtandyrý jáne buǵattaý júıelerin jańǵyrtýǵa erekshe nazar aýdarylyp otyr.
Magıstraldyq kabelder men talshyqty-optıkalyq baılanys jelilerin tóseý tolyq aıaqtalǵan.
Qazir kabelderdi synaqtan ótkizý, jalǵaǵysh jáne tarmaqtaǵysh mýftalardy ornatý, jol jáshikterin montajdaý jáne blok-ýchaskelerdi iske qosý-baptaý jumystaryna daıyndyq júrgizilýde.
Joba tolyq aıaqtalǵannan keıin ýchaske qabyldaý-jóneltý joldarynyń zamanaýı ınfraqurylymymen jáne qozǵalysty basqarýdyń jańartylǵan júıesimen qamtamasyz etiledi.
– Bul temirjol tasymalynyń qaýipsizdigin arttyryp, magıstraldyń ótkizý qabiletin edáýir ulǵaıtýǵa múmkindik beredi, – delingen málimette.
Jobanyń nátıjesinde «Beıneý – Mańǵystaý» ýchaskesiniń ótkizý qabileti táýligine 12 jup poıyzdan 17 jup poıyzǵa deıin artady.
Aıta keteıik, temirjol vokzaldaryn jańǵyrtý jumystary qalaı júrip jatqanyn mynaý siltemeden oqı alasyz.
