«Beıneý-Bozoı-Shymkent» qubyry 2 mln. turǵyndy gazben qamtamasyz etedi

ASTANA. QazAqparat - «Beıneý-Bozoı-Shymkent» gaz qubyry 2 mln. turǵyndy gazben qamtamasyz etedi. Bul týraly búgin Ortalyq kommýnıkatsııalar qyzmetindegi baspasóz máslıhatynda Energetıka vıtse-mınıstri Maǵzum Myrzaǵalıev málim etti.

«Osydan eki apta buryn «Beıneý-Bozoı-Shymkent» gaz qubyrynyń jobasy boıynsha «Beıneý-Bozoı» jelilik bóliginiń qurylysy aıaqtaldy. Al «Bozoı-Shymkent» bóligi 2013 jyldyń sońynda iske qosylyp, qazirdiń ózinde bul bólik arqyly 2 mlrd. tekshe metrden astam gaz tasymaldandy»,-dep toqtaldy M. Myrzaǵalıev.

Jalpy, jobanyń tolyq aıaqtalýy 2017 jylǵa josparlanyp otyr. Jobalyq qýaty jylyna 10 mlrd. tekshe metr gaz bolady dep kútilýde.

«Osy aýqymdy jobany iske asyrý nátıjesinde shamamen 600 eldi mekendi, ıaǵnı 2 mln. turǵyndy gazben qamtý josparlanyp otyr. Bul turǵyda Qazaqstannyń ońtústik óńirleri otandyq gazben qamtamasyz etilip, eldiń ımportqa táýeldiligi tómendeıdi»,-dep túıdi ol.