«Beıneý — Bozoı — Shymkent» qubyrynyń jyldyq qýaty 15 mlrd tekshe metrlik ekinshi jelisi salynady
ASTANA. KAZINFORM — «Beıneý — Bozoı — Shymkent» gaz qubyrynyń qýaty jylyna 15 mlrd tekshe metr bolatyn ekinshi jelisi salynady. Bul týraly Májilis depýtattarynyń saýalyna premer-mınıstr Oljas Bektenovtiń jaýabynda aıtylǵan.
— Búgingi tańda Úkimet gazdandyrýdyń túrli nusqalaryn, onyń ishinde ishki gaz resýrstary esebinen, sondaı-aq shekaralas memleketterden gaz ımporttaý arqyly júzege asyrý múmkindikterin pysyqtap jatyr. Máselen, Aqmola jáne Soltústik Qazaqstan oblystaryn gazdandyrý maqsatynda «Saryarqa» magıstraldyq gaz qubyrynyń ekinshi (Astana — Kókshetaý qalalary), úshinshi (Kókshetaý — Petropavl qalalary) jáne tórtinshi (gaz qubyrynyń qýatyn saǵatyna 606 myń tekshe metrden 801 myń tekshe metrge deıin arttyrý úshin eki kompressorlyq stantsııanyń qurylysy) kezeńderin salý jumystary jalǵasatyn bolady, — dedi Oljas Bektenov.
Úkimet basshysynyń atap ótýinshe, atalǵan jobany iske asyrý úshin «Beıneý — Bozoı — Shymkent» gaz qubyrynyń qýaty jylyna 15 mlrd tekshe metr bolatyn ekinshi jelisin salý josparlanyp otyr. Ol úshin bıyl 13-14 aqpanda Qatarda joǵaryda atalǵan jobany birlesip iske asyrý boıynsha qatarlyq ınvestormen — Power International Holding kompanııasymen kelisimderge qol qoıyldy.
— Búginde qýaty jylyna 10 mlrd tekshe metrge deıin, uzyndyǵy 1 450 shaqyrym jáne úsh jańa kompressorlyq stantsııasy bar gaz qubyrynyń jelilik bóligin salýdy kózdeıtin birinshi kezeń boıynsha qurylys-montajdaý jumystary bastaldy. Ekinshi kezeń aıasynda gaz qubyrynyń qýatyn jylyna 15 mlrd tekshe metrge deıin jetkizý úshin qosymsha úsh kompressorlyq stansa salý jasparlanyp otyr. Qazirgi ýaqytta jobany iske asyrý bekitilgen kestege sáıkes júzege asyrylyp jatyr, — dedi ol.
Aıta keteıik, elimizdiń soltústik pen shyǵys óńirlerge kórshi elderden gaz ımporttaý boıynsha kelissóz júrgizilip jatyr.