Beıneý aýdany ekologııalyq zilzala aımaǵy dep tanyla ma

ASTANA. QazAqparat – Úkimet basshysy Álıhan Smaıylov Senat depýtattarynyń Mańǵystaý oblysy Beıneý aýdanynyń aýmaǵyn Aral óńirindegi ekologııalyq qasiret saldarynan zardap shekken aımaq dep jarııalaýǵa qatysty saýalyna jaýap berdi, dep habarlaıdy QazAqparat tilshisi.

«Osy máseleni jedel sheshý úshin tótenshe ekologııalyq jaǵdaı aımaǵy nemese ekologııalyq zilzala aımaǵy dep jarııalanýy boljanatyn aýmaqty zerdeleý maqsatynda zertteýlerdi Qazaqstan Respýblıkasy Bıýdjet kodeksiniń 64-babyna sáıkes jergilikti bıýdjet qarajaty esebinen qarjylandyrý múmkin bolady. Oǵan saı qorshaǵan ortany qorǵaý jónindegi is-sharalarǵa jergilikti bıýdjetke túsken qorshaǵan ortaǵa jaǵymsyz áser etkeni úshin tólemaqynyń keminde júz paıyzy mólsherinde qarajat jiberiledi», - dep atap ótedi Álıhan Smaıylov jaýabynda.

Onyń atap ótýinshe, osyǵan baılanysty Qazaqstan Respýblıkasy Ekologııa kodeksiniń 405-babynyń 1-tarmaǵyna sáıkes Mańǵystaý oblysynyń ákimdigine tıisti komıssııa qurý máselesin pysyqtaý tapsyryldy.

«Júrgizilgen zertteýlerdiń nátıjeleri boıynsha jáne qorshaǵan ortany qorǵaý salasyndaǵy ýákiletti organnyń memlekettik ekologııalyq saraptamasynyń oń qorytyndysyna, sondaı-aq densaýlyq saqtaý, bilim jáne ǵylym salasyndaǵy ýákiletti memlekettik organdardyń qorytyndylaryna sáıkes aýmaq: Qazaqstan Respýblıkasy Úkimetiniń qaýlysymen – tótenshe ekologııalyq jaǵdaı aımaǵy; Qazaqstan Respýblıkasynyń zańymen – ekologııalyq zilzala aımaǵy dep jarııalanady. Mańǵystaý oblysy Beıneý aýdanynyń aýmaǵy tótenshe ekologııalyq jaǵdaı aımaǵy nemese ekologııalyq zilzala aımaǵy dep tanylǵan jaǵdaıda zańnamada belgilengen tártippen tıisti is-sharalar qabyldanatyn bolady», - dedi Úkimet basshysy.