Beıneý aýdanynda jalǵan kýálikpen jumysqa ornalasqan pedagogter anyqtaldy
AQTAÝ. KAZINFORM — Sot úkimi boıynsha 7 pedagog Qylmystyq kodekstiń 385-baby 3-bóligi boıynsha kináli dep tanylyp, olarǵa aıyppul jazasy taǵaıyndaldy. Bul týraly Mańǵystaý oblysynyń prokýratýrasy habarlady.
Bilim berý sapasynyń zańdylyǵyna júrgizilgen taldaý nátıjesi boıynsha pedagogtardyń kásiptik daıarlyqtan ótý kýálikteriniń jalǵan ekeni anyqtaldy.
— «Á» esimdi pedagog 2024 jyly naýryz aıynda SDU University ýnıversıtetiniń (Almaty qalasy) «Arnaıy pedagogıka» mamandyǵy «logoped-defektolog» biliktiligi boıynsha qaıta daıarlaý kýrsynan ótkeni týraly jalǵan kýáligin paıdalaný arqyly, mektepte «pedagog-psıholog» laýazymynda jumys istegen, — delingen habarlamada.
Uqsas derekter, aýdandaǵy orta bilim berý uıymdaryndaǵy 6 pedagogten anyqtaldy.
Atalǵan áreketter úshin, sot úkimi boıynsha 7 pedagog Qylmystyq Kodekstiń 385-baby 3-bóligi boıynsha kináli dep tanylyp, olarǵa aıyppul jazasy taǵaıyndaldy.
Aıta ketelik birneshe óńirde jalǵan dıplommen jumys istegen bapkerler áshkerelengen edi.