«Beıneý-Aqtaý» joly qurylysynyń 80%-y aıaqtalǵan
AQTAÝ. QazAqparat - Azııa damý banki 36 mlrd teńgege qarjylandyrǵan ınvestıtsııalyq joba - «Beıneý-Aqtaý» avtomobıl joly qurylysynyń 80%-y aıaqtalǵan.
Bıylǵy jyly 7 mlrd teńge ıgerilip, qazan aıynda barlyq joldy paıdalanýǵa berý josparlanyp otyr. Bul týraly Mańǵystaý oblysynyń ákimi Eraly Toǵjanovtyń Qaraqııa aýdanyna barǵan jumys saparynda belgili boldy, dep habarlaıdy «QazAqparat» HAA tilshisi.
Óńir basshysy birinshi kezekte «Aqtaý-Jetibaı-Shetpe» ýchaskesin qaıta qurý boıynsha «Beıneý-Aqtaý» avtomobıl jolynyń jumystarymen tanysty. Joba 2015 jyly bastalǵan, oǵan Azııa damý banki 36,335 mln teńge kóleminde qarjy bóldi. Joba boıynsha «Aqtaý-Jetibaı» ýchaskesi 1 dárejeli, tórt jolaqty bolyp salynýda jáne orta tusyna tosqaýyldar qoıylady. Jalpy uzyndyǵy 170 shaqyrymdy quraıtyn avtomobıl jolynyń qurylysyna Mańǵystaý oblysynyń, sonyń ishinde Jetibaı jáne Munaıshy aýyldarynyń turǵyndary tartyldy.
«Bıyl 36 mlrd teńgeniń 7 mlrd 200 mln teńge qarjysy ıgeriletin bolady. Qazirgi tańda biz ýchaske boıynsha jumystyń 80%-yn atqardyq. Asfaltbetonnyń úshinshi qabaty tóselýde. Qurylys kezinde qazaqstandyq materıaldardy qoldanýdamyz. Biz buryn reseılik bıtýmdy qoldansaq, qazir «KaspıBıtým» zaýyty ashylǵaly beri jergilikti jetkizýshilerdiń ónimin paıdalanýdamyz. Ótken jyly 45 myń tonna bıtým paıdalansaq, bıyl 25-30 myń tonna alýdy josparlap otyrmyz. Kópirlerdi turǵyzý úshin temir betondyq ónimderdi (TBÓ) Aqtóbe men Almatydan aldyrtyp jatyrmyz. Qıyrshyq tasty tek Shetpe aýylyndaǵy karerden jetkizýdemiz», - dedi «Djengız Inshaat» kompanııasynyń Aqtaý qalasyndaǵy bólimshesiniń dırektory Murat Zeınabilov.
