Beınekamerany urlaǵan qustyń ushý joly vıdeoǵa túsip qalǵan
ASTANA. 4 jeltoqsan. QazAqparat - Avstralııada batyl qus beınekamerany urlap, onymen birge 100 shaqyrymdaı jerdi ushyp ótken.
Kamera bul ýaqytta qosylyp turǵan jáne qustyń búkil ushý joly oǵan túsip qalǵan. Beınejazbany Kımberlı okrýginiń reındjerleri jarııalady.
Vıdeoda alyp qustyń qanattary jáne tyrnaqtarymen kamerany qysa ustap ushyp bara jatqan jeri bar.
Avstralııada jabaıy tabıǵattyń saqtalýyn baqylap otyrǵan reındjerler qozǵalys tetigi bar kamerany Margaret-Rıver aýmaǵynda mamyr aıynda ornatqan bolatyn. Olar onda jergilikti qoltyraýyndardy túsirmek bolǵan. Qurylǵynyń ózi asa úlken emes: uzyndyǵy 10-15 santımetr, eni 5 santımetr. Kamera joǵalyp ketkende reındjerler ózenge túsip ketti degen pikirde bolǵan.
Alaıda kóp uzamaı ol Merı ózeni mańynan, ıaǵnı ornatylǵan jerinen 110 shaqyrym qashyqtyqtan tabyldy. Reındjerler beınejazbany kórip, kameranyń qalaı joǵalǵanyn bilgennen keıin tańdanbasqa sharalary qalmady. Aldaǵy ýaqytta olar osy syndy qurylǵylardy burandamamen bekitip ornatpaq, dep jazady Associated Press.
Qustyń túsirgen vıdeosy YouTube portalyna shyǵyp ta úlgerdi.
