Beınebaıandar men áıgili kompozıtorlarmen jumys - Dımash aldaǵy josparymen bólisti
«Árıne, ánshi úshin jaqsy kompozıtorlarmen jumys jasaý óte mańyzdy bolyp tabylady. Osy oraıda, meniń mansabymda, shyǵarmashylyq ómirimde jaqsy kompozıtorlar kezdesip jatyr dep aıtýǵa tolyq negiz bar. Qazirgi ýaqytta biz Igor Krýtoımen jaqsy mýzykalyq tandem bolyp júrmiz. Ol kisiniń kásibı turǵydaǵy biliktiligi, mýzykadaǵy bilimi týraly uzaq áńgime aıtýǵa bolady. Óıtkeni, ol Pavarottı, Lara Fabıan, Dmıtrıı Hvorostovskıı sekildi álemdik kompozıtorlarmen jumys jasaǵan bilikti óner ıesi. Qazirgi tańda Krýtoıdyń shyǵarǵan birneshe týyndylary meniń repertýaryma enip otyr», - dedi Dımash Qudaıbergen OKQ-da ótken baspasóz máslıhatynda.
Ánshi óz sózinde sol sekildi Ýolter degen «Tıtanık» áni boıynsha jumys jasaǵan tamasha kompozıtor, Gremmı syılyǵynyń eki márte ıegerimen shyǵarmashylyq qarym-qatynasta ekenin atap ótti.
«Biraq, halyqqa ábden tolyqqandy pisken daıyn shyǵarmany usynǵymyz keledi. Sol sebepten men ózime nemuraıly qaraı almaıtyn mýzykanttar qatarynan bolǵandyqtan, árbir ándi shyǵarmas buryn júz oılanyp, myń tolǵanamyn. Al meniń sahnaǵa alyp shyǵyp, oryndap júrgen ánderim tek kompozıtorlardyń emes, meniń de júregimnen ótken ánder. Al ol ánderdi birden keziktirý óte qıynǵa soǵady», - dedi ánshi.
Dımash jaqynda eń alǵashqy albomy jaryq kóretinin aıtyp ótti.
«Qazaq yrymshyl halyqpyz ǵoı. Aldaǵy maqsattardy jaıyp salǵandy jón kórmeımiz. Degenmen aıtyp óteıin, Igor aǵamyz ekeýmiz aıtyp júrgen «Qaljyraǵan aqqýlardyń sezimi» degen ánge beınebaıan túsirgeli jatyrmyz. Odan keıin Amerıkadaǵy kompozıtorlardan kelgen tamasha ánderge beınebaıan túsirgeli otyrmyz», - dedi Dımash.
Eske sala ketsek, buǵan deıin OKQ-da ótken baspasóz máslıhatynda Dımash Qudaıbergen Jastar jyly aıasynda Astanada kontsert beretinin habarlaǵan bolatynbyz.
