Beınebaqylaý, aýa baptaǵysh jáne tońazytqysh: zamanaýı vagondar jolǵa shyǵady

ASTANA. QazAqparat – Bıyl jolaýshylar tasymaly 100 vagonmen tolyǵady. 2030 jylǵa deıin 537 vagon satyp alynbaq, dep habarlaıdy QazAqparat tilshisi «Jolaýshylar tasymaly» AQ baspasóz qyzmetine silteme jasap.

«Jyl sońyna deıin «ZIKSTO» AQ shyǵarǵan jańa jolaýshylar vagondary jetkiziledi dep kútilýde. Vagondar aýa baptaý qurylǵysy, beınebaqylaý jáne órt sóndirý júıesimen jabdyqtalǵan. Sonymen qatar jańa vagondarda tońazytqyshtar, mıkrotolqyndy peshter, aýyzsý dıspenseri jáne ystyq sý tıtany bar. Odan bólek, elektr rozetkalary ornatylǵan», - delingen habarlamada.

Aqparatta aıtylǵandaı, jańa vagondar elimizdiń batys óńirlerine qatynaıdy.

«Sondaı-aq, 2025 jyldan bastap Stadler kompanııasynyń ekologııalyq taza dárethana keshenderimen, elektr rozetkalarymen, beınebaqylaý júıesimen, USB, sondaı-aq aýany baptaý júıesimen jabdyqtalǵan zamanaýı vagondaryn jetkizý bastalady. 2030 jylǵa deıin 537 vagon satyp alynbaq. Sońǵy 10 jylda «Jolaýshylar tasymaly» AQ parki 50% jańartyldy. Qaýipsizdik, jaılylyq jáne ekologııalylyq boıynsha zamanaýı halyqaralyq talaptarǵa jaýap beretin 1200 astam vagon satyp alyndy», - deıdi atalǵan mekemeden.

Aıta ketsek, «Jolaýshylar tasymaly» AQ-dan bólek, temirjol jolaýshylaryn tasymaldaıtyn 13 jeke kompanııa bar.