Beınebaqylaý júıelerine biryńǵaı talaptar engizildi
ASTANA. KAZINFORM — Qazaqstanda beınebaqylaý júıelerine qoıylatyn alǵashqy ulttyq standart bekitildi. Jańa qujatta beınekameralardy tańdaý, ornatý jáne paıdalaný talaptary naqty aıqyndalǵan. Standart 2026 jylǵy 1 qyrkúıekten bastap kúshine enip, jańa salynatyn jáne qaıta jańǵyrtylatyn ǵımarattardaǵy beınebaqylaý júıelerine qoldanylady. Bul týraly Saýda jáne ıntngratsııa mınıstrligi málim etti.
Qazaqstan Respýblıkasy Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń 2026 jylǵy 17 shildedegi № 30-NQ buıryǵymen «Beınebaqylaý júıeleri. Beınekameralardyń túrleri men ornalastyrylýyna qoıylatyn talaptar» ST RK 4031-2026 ulttyq standarty bekitildi.
ST RK 4031-2026 — ǵımarattar men qurylystardy jobalaý, salý jáne rekonstrýktsııalaý kezinde qoldanylatyn beınebaqylaý júıelerine qoıylatyn biryńǵaı talaptardy belgileıtin alǵashqy ulttyq standart.
Standart 2026 jylǵa arnalǵan Ulttyq standarttaý josparyna sáıkes ázirlendi. Standartty ázirleýge ótinim berýshi Qazaqstan Respýblıkasynyń Ulttyq qaýipsizdik komıteti boldy. Qujat 2026 jyldyń 1 qyrkúıeginen bastap qoldanysqa engiziledi.
— Qujat beınekameralardy tańdaý, ornalastyrý jáne paıdalaný talaptaryn birizdendirýge, sondaı-aq jabdyqtardyń ózara úılesimdiligin arttyrýǵa baǵyttalǵan. Standart jobalaý, salý jáne rekonstrýktsııalaý kezinde kózdeletin, keıinnen tsıfrlyq monıtorıng júıelerine qosylýy múmkin beınekameralar men beınebaqylaý júıelerine qoldanylady, — delingen habarlamada.
Qazaqstan Respýblıkasy Saýda jáne ıntegratsııa mınıstrligi Tehnıkalyq retteý jáne metrologııa komıtetiniń tóraǵasy Janna Esenbekova:
— Standarttyń negizgi jańalyqtarynyń biri beınekameralardyń tehnıkalyq sıpattamalaryna qoıylatyn biryńǵaı eń tómengi talaptardyń belgilenýi. Atap aıtqanda, matrıtsa túri, ajyratymdylyǵy, jaryq sezimtaldyǵy, kadr jıiligi, obektıvterdiń parametrleri, jumys temperatýrasynyń dıapazony, syrtqy áserlerden qorǵaý klastary, sondaı-aq jabdyqty montajdaý jáne ornalastyrý talaptary aıqyndaldy, - dep habarlady vedomstvodan.
Alǵash ret ulttyq deńgeıde beınekameralardyń qoldanylý maqsatyna qaraı jiktelýi belgilendi. Olar syrtqy aýmaqtardy baqylaýǵa, ǵımarattar men qurylystardyń ishki úı-jaılaryn baqylaýǵa, adamdardy anyqtaý men sáıkestendirýge, kólik quraldarynyń memlekettik tirkeý nómirlik belgilerin tanýǵa, sondaı-aq basqarylatyn beınekameralarǵa arnalǵan bolyp bólinedi.
Sonymen qatar, standartta beınebaqylaý júıelerine qoıylatyn júıelik talaptar bekitilgen. Atap aıtqanda, olar beınemálimetterdi úzdiksiz tirkeýdi, berýdi, óńdeýdi jáne keminde 30 táýlik saqtaýdy qamtamasyz etýi tıis. Júıeler ózara is-qımyldyń zamanaýı hattamalaryn qoldaýy, ulttyq aqparattyq qaýipsizdik talaptaryna saı aqparatty qorǵaýy, sondaı-aq tulǵalardy, kólik nómirlerin taný jáne oqıǵalardy tirkeýdi qosa alǵanda, zııatkerlik beınetaldaýdy qoldaný múmkindigin qamtamasyz etýi qajet.
Aıta keteıik, Astanada beınebaqylaý kameralarynyń sany bir jylda eki esege artty.
