Beıkúná adamdy óltirý – barsha adamdy óltirgenmen teń: QMDB úndeý jasady
ASTANA. KAZINFORM - Qazaqstan musylmandary dinı basqarmasy sońǵy kezderi jıilep ketken keleńsiz oqıǵalarǵa qatysty úndeý jasady.
«Sońǵy kezderi qoǵamda bolyp jatqan túrli qatigezdik oqıǵalar bárimizdi qatty alańdatýda. Oqýshylardyń jappaı tóbelesi, jastar arasynda ózine qol jumsaý oqıǵalarynyń jıi qaıtalanýy, turmystyq qaqtyǵystyń sońy ólimge ulasýy syndy aýyr jaǵdaılar janymyzǵa qatty batýda.
Shyn máninde Allaǵa ıman etken pende adam túgil janýardyń ózine zııan tıgizbeýi tıis. Ardaqty Paıǵambarymyz (oǵan Allanyń salaýaty men sálemi bolsyn): «Naǵyz musylman — ózgelerge tilimen de, qolymen de zııan tıgizbegen adam» degen. Hadısten tálim alǵan musylman adamdarǵa tilimen de, qolymen de zııan tıgizbeýge tyrysady.
Sharıǵatymyz boıynsha beıkúná adamdy óltirý — barsha adamdy óltirgenmen teń. Sondaı-aq bireýdi ólimnen qutqarý — barsha adamdy ólimnen qutqaryp qalýmen teń. Muny jastarymyz jadynda ustap, ómirlik qaǵıdasyna aınaldyrýy qajet.», — delingen dinı basqarmanyń úndeýinde.
Onda Alla Taǵalanyń qasıetti kitabynan mysal keltirilgen. Quranda mynadaı joldar bar: «…Kimde kim kisi óltirmegen nemese jer betinde búlik shyǵaryp, buzaqylyq jasamaǵan beıkúná jandy naqaqtan-naqaq óltirse, búkil adamzatty óltirgendeı bolady. Sondaı-aq kim bireýdi ólimnen qutqaryp qalsa, búkil adamzatty ólimnen qutqarǵandaı bolady…» («Máıda» súresi, 32-aıat).
Qazaqstan musylmandary dinı basqarmasy elimizdegi barsha azamatty ózara baýyrmal, keshirimdi, meıirimdi bolýǵa úndeı otyryp, qatigezdik isterge jol bermeýge shaqyrady. QMDB ujymy qaraly úılerdiń qaıǵysyna ortaqtasyp, marqumdardyń otbasyna, týǵan-týystaryna taǵy da kóńil aıtady.
«Alla Taǵala marqumdardy raqymyna bólep, máńgilik mekenin jánnattan etkeı. Ámın!
Jaratýshy Iemiz halqymyzǵa amandyq, jerimizge tynyshtyq, jastarymyzǵa ıman baılyǵyn násip etip, jas býyn ókilderin qylmystyq isterden, kúnáli áreketterden saqtaǵaı. Ámın!», — dep jazdy Qazaqstan musylmandary dinı basqarmasynan.
