Beıitterdi jekeniń basqarýyna bergen Aqtóbe ákimdiginiń zań buzǵany anyqtaldy
AQTÓBE. QazAqparat - Aqtóbedegi 50 beıitti bir kompanııaǵa senimgerlik basqarýmen bergen ákimdiktiń jumysy tekserilip jatyr. Aqtóbe oblystyq tabıǵı monopolııalardy retteý jáne básekelestikti qorǵaý departamenti eskertý berdi, dep habarlaıdy QazAqparat tilshisi.
Aqtóbedegi beıitter jekeniń qolyna ótip, Qýraıly aýyldyq okrýgi ákimdik sheshimine qarsy bolǵany buǵan deıin habarlandy. Bul sheshimdi Aqtóbe oblystyq tabıǵı monopolııalardy retteý jáne básekelestikti qorǵaý departamenti tekserip, birneshe zańsyzdyqty anyqtady.
«Beıitterge qyzmet kórsetý quqyǵyn alǵan kompanııaǵa monopolııaǵa qarsy zańnyń buzylǵanyn habarlandy. Ol bul áreketimen básekelestikti saqtamaı otyr. Jeke kompanııa taǵy birneshe kompanııany qyzmet kórsetýge jiberedi. Al Aqtóbe qalasynyń ákimdigine de eskertý berildi. Aldyn ala eskertý beriledi, eger olar sheshim qabyldamasa tekserý júrgizemiz. Eger zań buzýshylyq anyqtalsa, ákimshilik jaýapkershilikke tartylady. Negizinen Bıýdjet týraly kodekske sáıkes beıitterge qyzmet kórsetý, kútim jasaýǵa bıýdjetten qarjy qarastyrylǵan. Jer týraly Kodekske sáıkes 6 sharshy metr jer tegin berilýi kerek dep jazylǵan. Memleket jerleýge arnalǵan jerdi tegin berýge mindetti. Qazirgi kezde zańbuzýshylyqtyń belgilerin kórip otyrmyz», - dedi Aqtóbe oblystyq tabıǵı monopolııalardy retteý jáne básekelestikti qorǵaý departamenti basshysynyń orynbasary Saǵyndyq Erǵalıev.
