Beıimdeý jáne yqpaldastyrý ortalyqtarynyń qyzmeti keńeıtiledi
NUR-SULTAN. QazAqparat - Qazaqstandaǵy beıimdeý jáne yqpaldastyrý ortalyqtarynyń qyzmetteri qonys aýdarýshylarǵa da taralady. Bul týraly Parlament Májilisinde kóshi-qon protsesterin retteý máseleleri boıynsha ózgerister engizý týraly zań jobasy tanystyrý barysynda QR Eńbek jáne halyqty áleýmettik qorǵaý vıtse-mınıstri Aqmádı Sarbasov málim etti, dep habarlaıdy QazAqparat tilshisi.
«Qazaqstanda qazirgi ýaqytta oralmandar úshin beıimdeý jáne yqpaldastyrý boıynsha 3 ortalyq bar. Olar Qaraǵandy, Shymkent qalalarynda jáne Túrkistan oblysy Aqsýkent aýylynda ornalasqan. Sonymen birge, mundaı ortalyqtar Qazaqstan Respýblıkasy kóshi-qon saıasatynyń 2017-2021 jyldarǵa arnalǵan tujyrymdamasynda ortalyqtardyń qurylýyna qaramastan, oralmandar men qonys aýdarýshylardyń qonys aýdarý óńirlerinde (Aqmola, Qostanaı, Pavlodar, Shyǵys Qazaqstan, Soltústik Qazaqstan oblysy) qurylmaǵan. Osyǵan oraı, normatıvtik quqyqtyq bazany aldyn ala daıyndaý maqsatynda, Ortalyqtardyń beıimdelý jáne yqpaldastyrý qyzmetterin kórsetý fýnktsııalaryn oralmandarǵa ǵana emes, qonys aýdarýshylarǵa da keńeıtý usynylady», - dedi vıtse mınıstr.
Onyń aıtýynsha, búgingi kúni qonys aýdarýshylardy qabyldaýdyń óńirlik kvotasyna engizýge azamattardan ótinishter qabyldaý quzyreti jergilikti atqarýshy organdarǵa, atap aıtqanda, jumyspen qamtýdy úılestirý basqarmalaryna júktelgen. Biraq is júzinde barlyq qonys aýdarýshylar jumyspen qamtý ortalyqtaryna ótinish bildiredi. Sondyqtan osy quzyretti jumyspen qamtý ortalyqtaryna zańdy túrde bekitý usynylady.
Budan buryn habarlanǵandaı, zań jobasy aıasynda Qazaqstanǵa qandastardyń qonys aýdarýy rásimderi ózgertilmek.
