Beıbitshilik qusy: Ulttyq bank jańa monetany aınalymǵa shyǵarady
ASTANA. KAZINFORM — Qazaqstan Ulttyq banki «Qazaqstandy monetalar arqyly tany» serııasynan WORLD PAINTING kollektsııalyq monetasyn aınalysqa shyǵarady.
Monetalar satýǵa shyǵarylatyn kún jaıly aqparat QUB resmı saıtynda qosymsha habarlanady.
WORLD PAINTING kollektsııalyq monetalary Dpartners art-agenttigimen kollaboratsııalyq joba aıasynda shyǵarylady.
Qazaqstannyń halyqaralyq World Painting art-jobasyndaǵy fragmenti — Semeı polıgonynda ıadrolyq synaqtan zardap shekken sýretshi Káripbek Kúıikovtiń beıbitshilik qusy — kógershin sýreti men Ábilhan Qasteevtiń nemeresi, sýretshi Dáýren Qasteev salǵan záıtún aǵashynyń butaǵy moneta dızaınyna negiz bolyp otyr.
WORLD PAINTING moneta jobasy — adamzatty biriktiretin týyndy. Halyqaralyq áleýmettik art-joba — álem elderi ókilderiniń qolynan shyqqan fragmentter mozaıkasynan turady.
«Álem beınesi» bir qylqalamdy bir-birine berý arqyly eń kóp adam qatysqan óner týyndysy retinde Gınnes rekordyn ornatty.
Art-jobaǵa 200-deı elden 2070 adam boıaý izin qaldyrdy. Keneptiń uzyndyǵy — 4 metr, bıiktigi 1 metr 27 santımetr.
Bul — jer sharynyń kishireıtilgen aýqymdaǵy parametrleri. «Álem beınesi» týyndysynyń kóshirmesi halyqaralyq ǵarysh stantsııasyn da sharlap qaıtty.
Art-obekt — planetanyń barlyq turǵyny ultyna, násiline, dinine jáne turǵylyqty jerine qaramastan Jer betinde úılesimdilik pen kelisim ornaǵan beıbit ári berekeli ómirdi armandaıtynynyń aıqyn dáleli.
Kenepte Oljas Súleımenov, Dımash Qudaıbergen, Aleksandr Vınokýrov, Tımýr Bekmambetov, Nıkolıa Sarkozı, Roı Djons, Baı Lıng jáne basqa da tanymal adamdar óz belgilerin qaldyrdy.
Monetalar kúmisten jasaldy, synamasy — 925/1000. Túrli-tústi baspa tehnologııasy qoldanyldy. Moneta massasy — 62,2 gramm, dıametri — 50 mm, daıyndaý sapasy — proof, nomınaly — 2 000 teńge. Monetanyń taralymy — 300 dana.
Melhıordan jasalǵan moneta da bar.
Monetanyń bári de Qazaqstan Respýblıkasynyń búkil aýmaǵynda nomınaldy qunyna saı tólemniń barlyq túri boıynsha qabyldanýǵa, sondaı-aq eldiń barlyq bankinde bank shottaryna esepke alynýǵa, aýdarýǵa, usaqtalýǵa jáne aıyrbastalýǵa jatady.
Kúmisten jasalǵan WORLD PAINTING monetalary memlekettik, orys jáne aǵylshyn tilderinde QUB sapa sertıfıkatymen kádesyı qaptamasynda, melhıor qospasynan jasalǵan monetalar blısterlik qaptamada shyǵarylady.
Kollektsııalyq monetalar Qazaqstan teńge saraıynda daıyndaldy.
