«Beıbitshilik keńesiniń» alǵashqy otyrysy 19 aqpanda Vashıngtonda ótýi múmkin

ASTANA. KAZINFORM – AQSh prezıdenti Donald Tramp tóraǵalyq etetin «Beıbitshilik keńesiniń» alǵashqy otyrysy 19 aqpanda Vashıngtonda ótýi múmkin, dep habarlaıdy DW.

Habarlanǵandaı, kezdesýge qatysatynyn Vengrııa premer-mınıstri Vıktor Orban rastady.

Qatysýshylar Gaza sektoryna qatysty yqtımal beıbitshilik josparyn talqylaıdy dep kútilýde.

Alǵashqy otyrysta Gaza sektoryn qalpyna keltirýge qarajat jınaý sharasyn ótkizý de josparlanǵan. Sonymen qatar jarııalanymda aıtylǵandaı, is-sharany uıymdastyrý jumystary ázirge bastapqy kezeńde, sondyqtan onyń kún tártibi ózgerýi múmkin.

— Ázirge eshteńe túpkilikti rastalǵan joq, alaıda AQSh prezıdenti Donald Tramptyń ákimshiligi kezdesýdi ótkizý múmkindigin qarastyryp, oǵan qandaı álemdik kóshbasshylar qatysa alatynyn pysyqtap jatyr, — dep keltiredi Axios basylymy derekkóz sózin.

Basylym málimetinshe, otyrysty Vashıngtondaǵy AQSh Beıbitshilik ınstıtýtynda (USIP) ótkizý josparlanǵan. 2025 jylǵy jeltoqsanda bul mekeme «Donald Tramp atyndaǵy Beıbitshilik ınstıtýty» bolyp qaıta ataldy. Aq úı bul máselege qatysty ázirge resmı túsinikteme bergen joq.

Aıta keteıik, tóraǵasy Donald Tramp bolyp tabylatyn «Beıbitshilik keńesiniń» quramynda qazir 27 qatysýshy bar. Bul organ 2026 jylǵy qańtarda Davosta ótken Dúnıejúzilik ekonomıkalyq forým aıasynda qurylǵan. Birqatar batys eli jańa bastamaǵa kúmánmen qarap, jańa format Birikken Ulttar Uıymy qurylymdaryna balama bolýy múmkin degen boljam aıtqan.

Qańtar aıynda Qazaqstanǵa Beıbitshilik keńesiniń quryltaıshy memleketteriniń biri bolý usynyldy. Qazaqstan Prezıdenti pákistandyq TheNewsInternational gazetine bergen eksklıýzıvti suhbatynda Keńes qurý bastamasyna qatysty óz pikirin bildirdi.