Beıbitshilik keńesi: Gazanyń damýy men ınfraqurylymyn qalpyna keltirý jospary tanystyryldy
VAShINGTON. KAZINFORM — Joǵary deńgeıdegi is-shara barysynda Beıbitshilik keńesiniń atqarýshy organdarynyń músheleri baıandama jasady, dep habarlaıdy Aqordanyń baspasóz qyzmeti.
Jıynǵa qatysýshylarǵa Gaza sektoryn qalpyna keltirý, sonyń ishinde ınfraqurylymdy damytý, qaýipsizdikti qamtamasyz etý jáne halyqaralyq qarjylandyrý jospary tanystyryldy.
Joǵarǵy atqarýshy keńestiń múshesi Djared Kýshner Gazany damytýǵa arnalǵan bas jospar týraly málimet berip, aımaq turmys-tirshilikke jáne ekonomıkalyq órleýge qolaıly jaǵdaı jasaıtyn zamanaýı keńistikke aınalýǵa tıis ekenin atap ótti.
Dúnıejúzilik bank tóraǵasy Adjaı Banga Beıbitshilik keńesiniń qarjy mehanızmderi ashyqtyqqa jáne qarjyny naqty maqsattarǵa bólý qaǵıdattaryna negizdeletinin jetkizdi.
Al Halyqaralyq turaqtandyrý kúshteriniń jetekshisi, general Djasper Djeffers Gazadaǵy qaýipsizdik pen turaqtylyqty qamtamasyz etý sharalary jóninde aıtty.
Gazany basqarý jónindegi ulttyq komıtettiń basshysy Alı Shaat qaıta qalpyna keltirý jumystaryn úılestirý jáne halyqaralyq seriktestermen yqpaldastyq tásilderin usyndy.
Sonymen qatar jıynda Bahreın Koroli Hamad ben Isa Ál Halıfa, Qatar Ámiri sheıh Támım ben Hamad Ál Tánı, Ózbekstan Prezıdenti Shavkat Mırzıeev, Indonezııa Prezıdenti Prabovo Sýbıanto, Rýmynııa Prezıdenti Nıkýshor Dan, Albanııa Premer-mınıstri Edı Rama, Mysyr Premer-mınıstri Mostafa Madbýlı, BAÁ Premer-mınıstriniń orynbasary, Syrtqy ister mınıstri sheıh Abdýlla ben Zaıd Ál Nahaıan, Túrkııa Syrtqy ister mınıstri Hakan Fıdan, Kýveıt Syrtqy ister mınıstri sheıh Salem Abdýlla ál-Djaber Ás-Sabah, Saýd Arabııasynyń memlekettik mınıstri Adel ál-Djýbeır, Marokko Syrtqy ister mınıstri Naser Býrıta jáne basqa da tulǵalar sóz sóıledi.
Keıinnen Vashıngtondaǵy Beıbitshilik keńesine qatysýshylar birge sýretke tústi.
Buǵan deıin Donald Tramp Qazaqstandy keremet ári baı el retinde sıpattaǵany belgili boldy.