Beıbitshilik keńesine múshe elder Gaza sektoryn qalpyna keltirýge 5 mıllıard dollar bóledi — Tramp
ASTANA. KAZINFORM — Beıbitshilik keńesine múshe memleketter 19 aqpanda ótetin alǵashqy otyrysta Gaza sektoryndaǵy gýmanıtarlyq kómek pen qalpyna keltirý jumystaryna 5 mıllıard dollardan astam qarjy bóletinin jarııalaıdy.
Bul týraly AQSh prezıdenti Donald Tramp Truth Social áleýmettik jelisinde málimdedi. Onyń aıtýynsha, bul týraly 19 aqpanda Vashıngtonnyń Donald Tramp atyndaǵy Beıbitshilik ınstıtýtynda Beıbitshilik keńesiniń birinshi otyrysynda jarııalanady.
Amerıka basshysy ótken jyldyń qazan aıynda Gazadaǵy qaqtyǵysty túpkilikti retteý josparyn usynǵanyn, ony BUU Qaýipsizdik Keńesi biraýyzdan qoldaǵanyn eske saldy. Budan keıin gýmanıtarlyq kómek jedel uıymdastyrylyp, barlyq kepilge alynǵandardy bosatý qamtamasyz etilgen.
Ol sondaı-aq qańtar aıynda Davosta Beıbitshilik keńesiniń negizin qalaýshylarmen kezdesý ótkenin, onda Gazanyń beıbit turǵyndarynyń bolashaǵy týraly «batyl kózqaras» usynylǵanyn atap ótti.
— 2026 jyldyń 19 aqpanynda menimen birge Vashıngtondaǵy Beıbitshilik ınstıtýtyndaǵy Beıbitshilik keńesiniń músheleri taǵy bas qosady. Onda keńeske múshe memleketter Gazadaǵy gýmanıtarlyq kúsh-jiger men qaıta qurý úshin 5 mıllıard dollardan astam qarjy bólýge ýáde beremiz, — dedi Tramp.
Ol qatysýshy elder Gazadaǵy qaýipsizdikti qamtamasyz etý úshin halyqaralyq turaqtandyrý kúshteri men jergilikti quqyq qorǵaý organdaryna myńdaǵan adam jiberetinin aıtty.
— HAMAS-tyń tolyq jáne dereý demılıtarızatsııalaý jónindegi mindettemelerin oryndaýy óte mańyzdy, — dep jazdy Tramp.
AQSh prezıdenti Beıbitshilik keńesiniń «tarıhtaǵy eń yqpaldy halyqaralyq organǵa» aınalatynyna senim bildirip, bul qurylymdy basqarý ol úshin úlken mártebe ekenin aıtty.
Aıta keteıik, Donald Tramp tóraǵalyq etetin Beıbitshilik keńestiń quramynda qazir 27 qatysýshy bar. Bul organ 2026 jylǵy qańtarda Davosta ótken Dúnıejúzilik ekonomıkalyq forým aıasynda qurylǵan. Birqatar batys eli jańa bastamaǵa kúmánmen qarap, jańa format Birikken Ulttar Uıymy qurylymdaryna balama bolýy múmkin degen boljam aıtqan.
Qańtar aıynda Tramp Toqaev pen Qazaqstandy Beıbitshilik keńesine shaqyrdy. Qazaqstan Prezıdenti pákistandyq TheNewsInternational gazetine bergen eksklıýzıvti suhbatynda Beıbitshilik keńesin qurý týraly pikirin bildirdi.