Beıbit Juqaev Ulybrıtanııadaǵy dodany jeńispen bastady

ASTANA. KAZINFORM – Qazaqstandyq, álemniń 171-raketkasy Beıbit Juqaev kógal tósenishinde ótip jatqan Sýrbıton (Ulybrıtanııa) chellendjer týrnırin jeńispen bastady.

Qazaqstandyq tennısshi alǵashqy aınalymda dúnıejúzilik reıtıngide ózinen tórt saty tómen turǵan amerıkalyq Maksım Kressımen kortqa shyqty.

Bul match Beıbitke pálendeı kúshke túse qoıǵan joq. Ol qarsylasyn 6:4, 6:3 esebimen joldan taıdyrdy. 1 saǵat 20 mınýtqa sozylǵan báseke barysynda Juqaev 5 eıs jasap, 11 breık-poınttyń úsheýin paıdalandy. Kressı 8 eıspen ǵana kózge tústi.

Beıbit Juqaev shırek fınalǵa shyǵý úshin Aýstralııa ókilderi, álemniń 68-raketkasy Krıstofer O'Konnel nemese reıtıngide 105-satydaǵy Djeıms Dakvorttyń bireýimen talasady.

Eske sala keteıik, budan buryn Elena Rybakınanyń Parıj olımpıadasynda jekeleı synǵa kúsh salatynyn jazǵan bolatynbyz.