Beıbit Juqaev Seýl týrnırinde negizgi jarysqa qosyldy
ASTANA. KAZINFORM — Qazaqstandyq tennısshi, álemniń 528-raketkasy Beıbit Juqaev Seýl chellendjer týrnıriniń irikteý saıysynda eki ret jeńiske jetti.
Qazaqstandyq sportshy aldymen irikteýdiń jartylaı fınalynda álemdik reıtıngide 1 786-oryndaǵy ońtústikkoreıalyq Ko Mın Hony joldan taıdyrdy – 6:4, 6:4.
Beıbit Juqaev búgin irikteý saıysynyń fınalynda álemniń 463-raketkasy, japonııalyq Kokı Matsýdamen kortqa shyqty.
Alǵashqy set 6:4 esebimen Beıbittiń paıdasyna sheshildi. Ekinshi partııada taı-breıkte qazaqstandyq tennısshi esesin jibermedi – 7:6 (7:1).
Bir saǵat 47 mınýtqa sozylǵan tartysty básekede Juqaev 15 eıspen birge 6 breık-poınttyń ekeýin óz esebine jazdy. Matsýda 9 eıs, 1 breıkpen (2 breık-poınt) shekteldi.
Osylaısha, negizgi jarysqa joldama alǵan Beıbit Juqaevtyń kelesi qarsylasy keıin anyqtalady.
Taǵy bir qazaqstandyq, álemniń 200-raketkasy Tımofeı Skatov Seýl chellendjer týrnıriniń alǵashqy aınalymynda reıtıngide 132-satydaǵy grekııalyq Stefanos Sakellarıdıspen synǵa túsedi.
Seýldegi jarystyń júlde qory 225 myń AQSh dollaryna baǵalanǵan. Jeńimpaz 33 650 dollarǵa qosa 125 reıtıngilik upaıǵa ıe bolady. Munda reıtıngide 96-oryndaǵy horvatııalyq Marın Chılıch birinshi raketka bolyp tirkelgen.
Eske sala keteıik, budan buryn Elena Rybakınanyń álemdik reıtıngide kóshbasshylyq ornyn nyǵaıta túskenin jazǵan edik.
