Beıbit Juqaev Ońtústik Koreıada negizgi týrnırge joldama aldy
ASTANA. KAZINFORM — Qazaqstandyq tennısshi, álemniń 300-raketkasy Beıbit Juqaev Kvandjý (Ońtústik Koreıa) chellendjer týrnıriniń irikteý saıysyn sátti aıaqtady.
Іrikteýde 1-raketka bolyp tirkelgen B.Juqaev aldymen reıtıngide 466-oryndaǵy japonııalyq Masamıtı Imamýrany 6:3, 6:2 esebimen tize búktirdi.
Beıbit irikteý saıysynyń fınalynda reıtıngide 429-satydaǵy japonııalyq, 35 jastaǵy Hırokı Morııadan aılasyn asyrdy – 7:6 (9:7), 6:4. Bir saǵat 40 mınýtqa sozylǵan básekede Juqaev 13 eıspen birge 3 breık-poınttyń ekeýin qur jibergen joq. Morııa 1 eıs, 1 breıkpen (5 breık-poınt) shekteldi. Osylaısha, negizgi jarysqa joldama alǵan Beıbit Juqaevtyń kelesi qarsylasy keıin anyqtalady.
Búgin jańartylǵan ATR reıtıngisinde B.Juqaev 305-ten 300-ge kóterildi.
Qazaqstannyń birinshi raketkasy Aleksandr Býblık álemdik reıtıngide 11-ornyn saqtap qalsa, Aleksandr Shevchenko 74-ten 82-ge, Tımofeı Skatov 195-ten 198-ge syrǵydy. Mıhaıl Kýkýshkın 283-ten 282-ge aýysty.
Eske sala keteıik, budan buryn Elena Rybakınanyń Shtýtgart týrnıriniń eki dúrkin chempıony atanǵanyn jazǵan bolatynbyz.
Sondaı-aq 15 jastaǵy qazaqstandyq tennısshi Qytaıdaǵy týrnırde top jardy.
