Beıbit Juqaev AQSh-taǵy chellendjer jarysynyń chempıony atandy

Qazaqstandyq Beıbit Juqaev Sharlotsvıll (AQSh) chellendjer týrnıriniń chempıony atandy, dep habarlaıdy Kazinform.

Álemniń 247-raketkasy B.Juqaev fınalda dúnıejúzilik reıtıngte 376-orynda turǵan amerıkalyq, 20 jastaǵy Eıdan Meıomen bas júldeni sarapqa saldy.

Birinshi partııada esep 4:3 bolǵan mezette qazaqstandyq tennısshi breık jasaı bildi – 6:3.

Ekinshi sette Beıbit taǵy bir breık jasap, alǵa ketti – 4:2. Dopty qatty beretin B.Juqaev aqyry matchty jeńispen túıindedi – 6:4.

Bir saǵat 15 mınýtqa sozylǵan báseke barysynda B.Juqaev 11 eıs jasap, 5 breık-poınttyń ekeýin paıdalandy. Qarsylasy 6 eıspen kózge tústi.

Osy jeńisiniń arqasynda Beıbit Juqaev úzdik 200 tennısshiniń qataryna enip, Qazaqstannyń Aleksandr Býblıkten keıingi ekinshi raketkasy atanady.

Eske sala keteıik, budan buryn tennısten Qazaqstan jasóspirimder quramasy úzdik ondyqqa kirgenin jazǵan bolatynbyz.