«Beıbit kúnniń batyry»: Almaty oblysynda Asqar Zabıkýlınge arnalǵan is-shara ótti
Almaty oblysynda Asqar Zabıkýlın atyndaǵy «Jas órt sóndirýshiler» áskerı-patrıottyq klýbynda eske alý is-sharasy ótti, dep habarlaıdy Kazinform oblystyq Tótenshe jaǵdaılar departamentine silteme jasap.
Búgin, 5 qańtar kúni Almaty oblysy Uıǵyr aýdany Shonjy aýyly Abaı atyndaǵy mektep-gımnazııasynda beıbit kúnniń batyry Asqar Serikuly Zabıkýlınnyń týǵan kýnine arnalǵan eske alý is-sharasy ótti.
Esterińizge salsaq, Asqar Serikuly tótenshe jaǵdaılar salasynda eńbek etip, elimizge adal qyzmet etýdiń úlgisin kórsete bilgen azamat edi. Astanadaǵy kópqabatty úıde bolǵan órt kezinde oqıǵa ornyna shuǵyl jetip, birneshe adamnyń ómirin saqtap qaldy. Osy bir áreketi arqyly ol Otan aldyndaǵy azamattyq antyna berik ekenin jáne janqııarlyq erligin kórsetti.
2023 jylǵy 12 sáýirde Almaty oblysy Uıǵyr aýdanynyń Shonjy aýylynda Astanadaǵy kópqabatty úıde bolǵan órt kezinde birneshe adamnyń ómirin qutqaryp qalǵan Asqar Zabıkýlın atyndaǵy «Jas órt sóndirýshiler» áskerı-patrıottyq klýbynyń saltanatty ashylýy ótken bolatyn. Atalǵan is-sharanyń maqsaty – beıbit kúnniń batyry Asqar Serikuly Zabıkýlınniń erligi men batyldyǵyn ulyqtaý, bilim alýshylardyń boıyna patrıottyq sezimin qalyptastyrý.
Asqar Zabıkýlındi eske alý is-sharasyna QR TJM Órtke qarsy qyzmeti komıtetiniń tóraǵa orynbasary Marǵýlan Amanbaev onlaın qatysty. Ol óz quttyqtaýynda Almaty oblysy bilim basqarmasynyń qyzmetkerlerine, Abaı atyndaǵy mektep-gımnazııanyń pedagogıkalyq quramyna, ata-analar ujymy men oqýshylarǵa óskeleń urpaqty tárbıeleý máselelerinde atqaryp otyrǵan jumystary úshin zor alǵysyn bildirip, jańa tabystar men jetistikter tiledi, sondaı-aq balalardyń elimizdiń laıyqty azamattary atanýyna tilektestik bildirdi. Sonymen qatar, qaza tapqan batyrdyń jubaıy Anel Erǵalıqyzy vıdeobaılanys arqyly qatysyp, óz alǵysyn bildirdi.
Sonymen qatar atalǵan jıynǵa Almaty oblysy TJ departamenti bastyǵynyń orynbasary azamattyq qorǵaý polkovnıgi Qalıev Baqytnýr Habıdenuly, Uıǵyr aýdany Tótenshe jaǵdaılar bóliminiń qyzmetkerleri jáne mektep ujymy tolyq qatysty.
