Beıbit Isabaev jańa Konstıtýtsııanyń jobasyn talqylaý jıynyn ótkizdi
JETІSÝ. KAZINFORM — Jetisý oblysynyń ákimi Beıbit Isabaev qoǵam ókilderimen jańa Konstıtýtsııanyń jobasyn talqylaýǵa arnalǵan jıyn ótkizdi.
Jıynǵa qoǵamdyq keńester músheleri, jergilikti máslıhattar tóraǵalary, zııaly qaýym ókilderi, saıası partııalar men qoǵamdyq uıymdar ókilderi, túrli sala mamandary — jalpy júzden astam adam qatysty. Atap ótsek, jıynǵa oblystyq máslıhattyń tóraǵasy, Konstıtýtsııalyq reforma jónindegi komıssııa múshesi, óńirlik koalıtsııa tóraǵasynyń orynbasary Gúlnar Toılybaeva moderatorlyq etti.
Jıynnyń kirispe sózinde Beıbit Isabaev Konstıtýtsııada usynylyp otyrǵan ózgeristerdiń negizinde jatqan basty qaǵıdattarǵa toqtaldy.
— Atap aıtqanda, birinshiden, Parlament pen ókildi organdardyń rólin kúsheıtý. Bul — bılik tarmaqtary arasyndaǵy tepe-teńdikti nyǵaıtýǵa, sheshimderdi ashyq ári ınstıtýtsıonaldyq dıalog arqyly qabyldaýǵa baǵyttalǵan qadam. Ekinshiden, azamattardyń memleketti basqarý protsesine qatysýyn keńeıtý. Qoǵamdyq baqylaý tetikterin damytý, jergilikti ózin-ózi basqarýdy kúsheıtý, azamattyq qoǵam ınstıtýttarynyń sheshim qabyldaý úderisine naqty yqpal etýine jaǵdaı jasaý kózdelip otyr. Úshinshiden, adam quqyqtary men bostandyqtaryn nyǵaıtý. Konstıtýtsııa ár azamattyń qadir-qasıetin qorǵaýdyń naqty tetigine aınalýy tıis. Zań aldyndaǵy teńdik, ádil sot tóreligi, áleýmettik quqyqtardyń qorǵalýy — bul qaǵaz júzindegi uran emes, memlekettik saıasattyń ózekti mindeti. Tórtinshiden, jaýapty jáne kúshti memleket qalyptastyrý. Bılik qoǵam aldynda esep beretin, ınstıtýttar ashyq ári kásibı jumys isteıtin jerde ǵana senim qalyptasady. Al senim — búgingi tańda úlken kúsh jáne strategııalyq damý resýrsy, — dep atap ótti Beıbit Isabaev.
Budan keıin sóz alǵan jıynǵa qatysýshylar Ata Zańdaǵy ózgeristerdiń mán-mazmunyn ár qyrynan ashyp, oı-pikirlerin jetkizdi.
— Búginde elimiz durys baǵytta damyp keledi. Máselen, oblys qurylǵaly beri mádenıet salasynda qanshama nysan salynyp, jóndeýden ótti, bizge alańsyz jumys isteýge barlyq jaǵdaı jasalýda. Jalpy, Konstıtýtsııadaǵy jańa ózgeristerdiń bári halyq úshin jasalyp otyr. Memleket basshysynyń ıgi bastamalaryn iske asyrý, adal eńbek etý, bir maqsatqa jumylý — bárimizdiń ortaq mindetimiz, — dedi Qazaqstannyń halyq ártisi, B. Rımova atyndaǵy akademııalyq drama teatrynyń aktrısasy Almahan Kenjebekova.
Sol sııaqty Al «Erlik» qımyl qozǵalysy kem múgedekter qoǵamdyq birlestiginiń jetekshisi Roza Aqjarkenova referendýmǵa kedergisiz qatysý úshin saılaý ýchaskeleriniń múmkindigi shekteýli azamattar úshin qoljetimdi bolýy mańyzdy.
— Konstıtýtsııalyq reformalardyń negizinde ár adamǵa túsinikti ári jaqyn ıdeıa — ádildik, teń múmkindikter men árbir azamattyń múddesin qorǵaý qaǵıdaty jatyr. Bizdiń Jetisý óńirinde múgedektigi bar azamattardy qoldaýǵa erekshe kóńil bólingen. Qoljetimdi ınfraqurylym damytylyp, bilim alý men eńbekke ornalasýda teń jaǵdaı jasalyp, áleýmettik qyzmetterdiń sapasy artyp keledi. Qarapaıym ǵana mysal: oblys qurylǵannan beri ınvataksı sany 18-den 32-ge artty. Bul arnaıy kólik refrendým kúni úzdiksiz jumys isteıdi. Jalpy alǵanda, jańa Konstıtýtsııany qabyldaý jónindegi aldaǵy referendýmdy ádiletti ári turaqty memleket qurý jolyndaǵy der kezinde ári senimdi qadam dep esepteımin, — dedi Roza Aqjarkenova.
Sol sııaqty óz sózinde Jetisý oblysy qoǵamdyq keńesiniń tóraǵasy Áset Qydyrmanov eńbek adamynyń quqyǵyn qorǵaý máselesi jaıly aıtsa, oblystyq kásipkerler palatasynyń dırektory Dáýren Ońalbaev Ata zańdaǵy ózgerister memleket pen kásipkerler arasyndaǵy qarym-qatynasty nyǵaıta túsetinine toqtaldy. Al Jetisý ýnıversıtetiniń basqarma tóraǵasy-rektory Ermek Bóribaev jańa Konstıtýtsııa jobasynda mádenıet pen bilimge, ǵylym men ınnovatsııaǵa súıenetin damý modeline basymdyq berilip otyrǵanyn tilge tıek etti.
Jıynda Jetisý oblysy «Assambleıa jastary» Respýblıkalyq qoǵamdyq birlestiginiń tóraǵasy Ekaterına Podgornova da oı bólisti.
— Qazirgi saıası jańǵyrý kezeńinde biz, Jetisý jastary, shette qalmaı, Ata zańymyzdyń jańa ózgeristerimen belsendi azamat retinde zerttep shyqtyq. Qazirgi jastar — bilimdi, sanaly, tsıfrlyq álemde erkin, óz oıyn ashyq aıta alatyn býyn. Búgingi kúni jetistikke jetý joly óte ońaı, eń bastysy qoǵamǵa paıdańdy tıgizip, eline adal qyzmet etip, damý jolynda erinbeı eńbek etý mańyzdy. Biz ózgeristerdi qoldap qana qoımaı, sonyń belsendi qatysýshysy bolýǵa daıynbyz. Keleshek búginnen bastalady, — dedi ol.
Óńirdegi qoǵam ókilderi referendýmǵa qatysý elimizdiń aldaǵy damýyn qalyptastyratyn mańyzdy qadam ekenin aıtty.
— Ornyqty memleketter jaýapkershilikke, ádilettilikke, zań ústemdigine jáne adamǵa degen qurmetke negizdeledi. Jańa Konstıtýtsııa jobasy osy qundylyqtardy nyǵaıtýǵa baǵyttalǵan. Bizdiń ortaq maqsatymyz — ádiletti, ashyq ári tıimdi memleket qurý, — dedi jıyndy qorytyndylaǵan oblys ákimi Beıbit Isabaev.