Beıbit atom: Qazaqstan ǵylymı ınfraqurylymdy kúsheıtpek
ASTANA. KAZINFORM — ıAdrolyq fızıka ınstıtýtynyń Astana fılıalynda Qazaqstan Respýblıkasy Atom energııasy agenttiginiń tóraǵasy Almasadam Sátqalıevtiń qatysýymen Ǵylym qyzmetkerleri kúnine arnalǵan is-shara ótti.
Іs-shara aıasynda ıAdrolyq fızıka, radıatsııalyq materıaltaný, ıondyq-sáýlelik tehnologııalar, sondaı-aq atom salasyndaǵy otandyq ǵylym men tehnologııalyq quzyrettilikti damytý úshin mańyzy bar qoldanbaly zertteýler salasyndaǵy fılıal jumysynyń negizgi nátıjeleri usynyldy. Instıtýttyń mańyzdy ǵylymı-tehnologııalyq qondyrǵylarynyń biri retinde DTs-60 údetkish keshenine erekshe nazar aýdaryldy.
Almasadam Sátqalıev fılıal qyzmetkerlerin Ǵylym qyzmetkerleri kúnimen quttyqtap, olardyń elimizdiń ǵylymı áleýetin damytýǵa, bilikti mamandar daıarlaýǵa jáne atom energııasyn paıdalaný salasyndaǵy Qazaqstannyń zertteý bazasyn nyǵaıtýǵa qosqan úlesiniń mańyzdylyǵyn atap ótti. Ol ǵylymnyń, zamanaýı zertteý ınfraqurylymynyń jáne kadrlyq áleýettiń damýy eldiń tehnologııalyq bolashaǵy úshin strategııalyq mańyzy bar ekenin alǵa tartty.
Kezdesý barysynda Agenttik tóraǵasy ǵylymı qyzmetti memlekettiń, ekonomıkanyń jáne qoǵamnyń praktıkalyq qaıtarymy men naqty qajettilikterine odan ári baǵdarlaý qajettigin erekshe atady. Memleket basshysy tapsyrma bergendeı, ǵylym neǵurlym qoldanbaly mindetterge kóshýi, qoǵamǵa naqty paıda ákelýi, naqty nátıjelilikti qamtamasyz etýi jáne ekonomıka men óndiris suranystarymen tyǵyz baılanysty bolýy tıis ekendigi atap ótildi.
— Sondaı-aq ǵylymı úderisterge jasandy ıntellekt tehnologııalaryn engizý perspektıvalaryna erekshe nazar aýdaryldy. Atap aıtqanda, JI-di eńbek syıymdylyǵy joǵary jáne qaıtalanatyn operatsııalardy qysqartý, zertteýlerdiń jekelegen kezeńderinde adam-saǵatty azaıtý, ǵylymı aqparatty óńdeýdi avtomattandyrý, halyqaralyq jarııalanymdardy júıeleý, mamandandyrylǵan derekqorlar qalyptastyrý, sondaı-aq ǵylymı eksperımentterdi modeldeý, taldaý jáne súıemeldeýde zamanaýı tsıfrlyq sheshimderdi qoldaný máseleleri sóz boldy, — delingen agenttik habarlamasynda.
Budan buryn «ıAdrolyq tehnologııalar parki» Atom energııasy jónindegi agenttiktiń qaramaǵyna ótkenin jazdyq.