Beıbitti «Qajymuqan» dep atasaq ta jarasady - A. Shoraev
ASTANA. QazAqparat - B. Ystybaevty «Qajymuqan» dep atasaq ta jarasady. Búgin Ortalyq kommýnıkatsııalar qyzmetinde «Qazaqstan Barysy-2016» respýblıkalyq týrnıriniń qorytyndysyna arnalǵan brıfıngte «Qazaqstan Barysy» qazaq kúresin damytý qorynyń tóraǵasy Arman Shoraev osylaı málimdedi.
«Bıylǵy týrnır erekshe ótti. Beıbit Ystybaev úshinshi márte «Qazaqstan Barysy» atanyp otyr. Shyndyǵynda, Beıbitti «Qajymuqan» dep atasaq ta bolady. Osyndaı el namysyn, ult namysyn qorǵaǵan batyrlar, balýandar tarıhta qashanda bolǵan. Ókinishke qaraı, jurt aýzynda Naýryzbaı, Qabanbaı batyr dep kóp aıtylǵanymen, olardyń beınesi de belgisiz bizge. Al Beıbitke kelsek, ol sol babalarymyzdyń beınesin kóz aldymyzǵa ákeledi», - dedi A. Shoraev.
Onyń aıtýynsha, týrnır jurttyń da kóńilinen shyqty. «Árıne, kemshilikter bolmaıdy dep aıtýǵa kelmeıdi. Ol qashanda bolyp turady. Degenmen, biz altynshy márte týrnır ótkizip otyrmyz. Sheteldik áriptesterimiz de osal emes. Reseıden, Túrkııadan kelip jatyr. Sondyqtan da, bizdiń komandamyz halyqaralyq dep aıtýǵa keledi. Uıymdastyrýshylyq jaǵyn joǵary baǵalaımyn. «Qazaqstan Barysy» týrnırin Reseı men Túrkııa telearnalary tikeleı taratady, álemniń 120 elindegi aýdıtorııany qamtyp otyr», - dedi A. Shoraev.
Eske salsaq, jaqynda Astanada ótken altynshy «Qazaqstan Barysy-2016» respýblıkalyq týrnıriniń jeńimpazy Beıbit Ystybaev atanǵan bolatyn. Beıbit Ystybaev osyǵan deıin 2012 jáne 2015 jyly «Qazaqstan Barysy» ataǵyna qol jetkizgen edi. Týrnır jeńimpazy B. Ystybaevqa 25 000 000 teńge, altyn taıtuıaq jáne Astanadan bir bólmeli páter berildi. Ekinshi oryn alǵan Jumanazar Ersultanovqa 5 500 000 teńge, úshinshi oryn alǵan Aıbol Aıtbekke 1 800 000 teńge kóleminde syılyq tabystaldy.
