Beıbitshilikti saqtaý áskerı múmkindiktiń sherýin kórsetý arqyly emes, árbir eldiń táýelsizdigin qurmetteý arqyly kórinis tabýy kerek - Májilis Tóraǵasy
ASTANA. Mamyrdyń 14-i. QazAqparat - Beıbitshilikti saqtaý áskerı múmkindiktiń sherýin kórsetý arqyly emes, árbir eldiń táýelsizdigin qurmetteý arqyly kórinis tabýy kerek. Bul jóninde búgin Almaty qalasynda «EQYU-nyń eýrazııalyq ólshemi» atty Transazııalyq parlamenttik forýmnyń ashylýynda QR Parlamenti Májilisiniń Tóraǵasy Oral Muhamedjanov málimdedi,
dep habarlaıdy QazAqparat Májilistiń baspasóz qyzmetine silteme jasap.
Jıynǵa qatysýshy parlamentshilerge arnaǵan sózinde Májilis Tóraǵasy Qazaqstan EQYU kózqarasyn eýropalyqtan eýrazııalyqqa qaraı burýdy usynyp otyrǵanyna mańyz berip ótti. Bul rette Palata Tóraǵasy EQYU-nyń quramyna enetin elderdiń shekarasy óte aýqymdy, Azııa qurlyǵynyń da biraz bóligin alyp jatqanyn mysalǵa keltirdi.
«Eýrazııa júreginde oryn tepken Qazaqstanǵa eýropalyq jáne azııalyq jahandyq «qaýipsizdik tinin» jalǵastyrý rólin taǵdyrdyń ózi júktegendeı. Sonymen birge, Qazaqstannyń bastamasymen jáne tikeleı qatysýymen qurylǵan «ıntegratsııalyq tirektiń» alatyn orny erekshe. Onyń mysaly retinde qarqyndy damyp otyrǵan jalpyazııalyq forým - Azııadaǵy ózara is-qımyl jáne senim sharalary jónindegi keńes úlgi bola alady. Qazaqstannyń jas elordasynda turaqty ótkizilip kele jatqan Álemdik jáne dástúrli dinder kóshbasshylarynyń sezi búgingi dúnıejúziniń ǵalamdyq úndestiginiń órkendeýiniń naǵyz bóligi bolyp otyr», dedi Tóraǵa.
Transazııalyq parlamenttik forýmnyń minberinen Májilis Tóraǵasy Eýrazııa qurlyǵynda qaýipsizdik pen turaqtylyqqa qol jetkizý úshin qarý qoldanýdyń qaýpin seıiltýge birlesip bar kúshti jumsaý qajettigin alǵa tartty. Beıbitshilik saqtaý áskerı múmkindiktiń sherýin kórsetý arqyly emes, árbir eldiń táýelsizdigin qurmetteý arqyly kórinis tabýy keregin aıtty.
«Sondyqtan bizdiń basty maqsatymyz kimniń súringenin ańdymaı, tiltabysýdyń jolyn tapqanymyz durys dep oılaımyn. Qaýipsizdikti nyǵaıtý isinde halyqaralyq yntymaqtastyqtyń kókjıegin keńeıtýdiń birden-bir joly sol salada ulttyq zańnama men halyqaralyq quqyqty jetildirý bolyp tabylady. Bul jolda parlamenttik dıplomatııanyń múmkindigin paıdalanǵan durys. Ár túrli elder men halyqtar arasynda týyndaǵan máselelerdi kúshpen sheshýge bolmaıdy», dedi O. Muhamedjanov.
