Beıbitshilik jáne kelisim saraıyndaǵy kórmege qoıylǵan árbir kilemniń baǵasy 100 myń eýroǵa baǵalanyp otyr
sp;ASTANA. Jeltoqsannyń 8-i. QazAqparat /Gúlmıra Álıakparova/ - Búgin Astanada Beıbitshilik jáne kelisim saraıynda «Qazaq kilemderi. Ulytaýdyń ıgiligi» atty kórme ashyldy,
dep habarlaıdy QazAqparat.
«Shejire» qazirgi zamanǵy óner galereıasy uıymdastyrǵan kórmege Ońtústik Qazaqstannyń qolóner sheberleriniń 103 kilemi qoıyldy. Bul kilemder - kilem toqý ónerin qazaq qolóneriniń keremet salasy sanaıtyn, adamnyń ishki dúnıesiniń tolqýynan shyqqan qaıtalanbas óner týyndylaryn úzdiksiz jınap kele jatqan jeke adamnyń qorynan alynǵan. Іs-sharany uıymdastyrýshylar kollektsııa jınaýshynyń esimin atamaýdy uıǵardy.
«Shejire» qazirgi zamanǵy óner galereıasynyń dırektory Roza Júsipova, ár kilemniń quny 100 myń eýroǵa baǵalanyp otyrǵanyn jetkizip: «Bul baǵa jetpes kilemder. Sebebi, olar kilem toqýshylyqtyń buljymas ustanymdaryn saqtaı otyryp toqylǵan jáne eń bastysy - olardyń mazmundary biregeı. Kilemderge qatysty álemdik sektor, olardyń ishinde parsylyq, ırandyq jáne tájiktik kilemder qazaqtyń da asa mol týyndylarymen tolyǵýy kerek. Sebebi, bizdiń kilemder arqyly qazaq halqynyń danalyǵyn kórýge bolady. 2500 jyl burynǵy Bozaryq qorǵandarynda kezdestiretin abstraktili jáne tańbalyq sımvoldardy qazaq kilemderinde kezdestirýge bolady», - dedi ol.
Óz kezeginde kórmeniń kýratory, fılosofııa ǵylymdarynyń doktory Álibek Qajyǵalıuly: «Bul kórmeni uıymdastyrý arqyly ulttyq qundylyqtarymyzdan aıyrylyp qalmaý jaǵyn kórsetkimiz keldi. Tájmahaldyń úndiler úshin, bolmasa Teotıýakannyń úndister úshin mańyzy qandaı bolsa, qazaq oıýynyń da árbir qazaq úshin mańyzy sondaı bolýy tıis», - dep atap ótti ol.
Erteń Beıbitshilik jáne kelisim saraıynda atalmysh kórmeniń mazmundy jalǵasy retinde «Qazaqstanda kilem toqý óneriniń bolashaǵy bar ma?» degen taqyrypta semınar ótedi.
