Beıbitshilik jáne kelisim saraıynda jańajyldyq shyrsha toıy bolyp ótti

Bul sharaǵa memlekettik organdar qyzmetkerleriniń balalary qatysty, dep habarlaıdy QazAqparat.

Ásem bezendirilgen shyrsha tóńiregine jınalǵan baldyrǵandardy Aıaz ata men Aqsha qar qazaq jáne orys tilderinde quttyqtady. Balalarmen qosylyp án salyp, aınala bı bıledi. Barlyq balalarǵa syılyqtar tabys etildi.

Osydan keıin balalar zalǵa shaqyrylyp, qazirgi zamanǵa saı sahnalanǵan ańdar týraly ertegi boıynsha qoıylym kórsetildi. Elordalyq jas ártister sheber oınaǵan qoıylym balalarǵa qatty unady. Erteginiń sońyn ártister ańdardyń dostyǵy týraly ánmen aıaqtady. Aıta ketý kerek, bul qoıylym memlekettik tilde ótkendigimen erekshelendi.

Baldyrǵandardy qýanyshqa bólegen osy mádenı sharany Astana qalalyq Mádenıet basqarmasy men «Jastar» teatry uıymdastyrdy.